Mythau treisio
Mae yna lawer o fythau cyffredin ynghylch treisio ac ymosod rhywiol a allai wneud ichi feio’ch hun, neu gwestiynu a ydy'r hyn sydd wedi digwydd yn drosedd.
Does dim lle i'r mythau hyn yn y gyfraith. Dydyn ni ddim yn eu credu a fyddwn ni ddim yn eich amau o’u hachos nhw. Ni waeth pwy ydych chi na beth ddigwyddodd, rydyn ni yma i'ch cefnogi chi.
Mae’r cwestiwn a ydy rhywbeth yn dreisio neu’n ymosodiad rhywiol yn ymwneud â chydsyniad.
Nid eich bai chi yw hi, ac mae'n dal yn dresio neu'n ymosodiad rhywiol, ni waeth beth am y pethau canlynol:
- beth yw’ch perthynas chi â'r troseddwr
- a fuoch chi’n yfed neu'n cymryd cyffuriau
- beth roeddech chi'n ei wisgo
- a fuoch chi’n fflyrtio, yn cusanu, neu wedi gwahodd rhywun adref - does yr un o'r rhain yn golygu eich bod wedi cydsynio i gael rhyw
- os newidioch chi’ch meddwl a stopio cydsynio
- a wnaethoch chi ymladd yn ôl neu a gawsoch chi’ch anafu
- pa mor ypsét rydych chi'n ymddangos - does dim ffordd 'gywir' o ymateb
- pa mor bell yn ôl y digwyddodd y peth
- pwy bynnag ydych chi
- beth bynnag fo'ch gorffennol, yn rhywiol neu fel arall
- beth bynnag fo'ch rhyw neu'ch rhywedd - mae menywod, dynion a phobl anneuaidd i gyd yn cael eu treisio ac yn dioddef ymosodiadau rhywiol
- a oes gennych chi unrhyw gyflyrau neu namau iechyd corfforol neu feddyliol
Rydyn ni’n defnyddio’r gair ‘dioddefwr’ yn aml, ond rydyn ni’n gwybod ei bod yn well gan rai ddefnyddio’r gair ‘goroeswr’. Dyma wybodaeth am yr iaith rydyn ni’n ei defnyddio i siarad am dreisio ac ymosod rhywiol.
Treisio ac ymosod rhywiol o fewn perthynas
Myth yw’r sôn bod y rhan fwyaf o bobl yn dioddef ymosodiad gan ddieithriaid ar lonydd bach tywyll. Mae'r rhan fwyaf o ymosodwyr yn adnabod eu dioddefwyr ac maen nhw’n gallu bod yn berthnasau, ffrindiau neu gydweithwyr.
Gall treisio ac ymosod rhywiol ddigwydd o fewn priodas a pherthynas. Mae rhyw yn ymwneud â chydsyniad. Os yw eich partner wedi’ch gorfodi, wedi’ch bygwth neu wedi pwyso arnoch i gael rhyw gyda nhw, dyna dreisio.
Rhagor o wybodaeth am y mythau ynghylch treisio gan Rape Crisis.
Penderfynu riportio’r peth
Rydyn ni’n gwybod bod penderfynu riportio treisio ac ymosod rhywiol yn gallu bod yn anodd. Chi sydd i ddewis beth i'w wneud bob amser. Rydyn ni wedi llunio gwybodaeth a allai’ch helpu i penderfynu ai riportio’r peth yw’r cam cywir i chi.
Os byddwch yn penderfynu riportio i'r heddlu, gallwch riportio’r peth:
- ar-lein
- drwy alw 101
- drwy fynd i orsaf heddlu
Os hoffech chi riportio’r peth ond nid ydych yn awyddus i siarad yn uniongyrchol â ni, gallwch riportio treisio ac ymosodiadau rhywiol hefyd i sefydliadau cymorth sy’n gallu’ch helpu drwy’r broses i gyd.