Rôl Cwnstabl Gwirfoddol yr Heddlu (Swyddog Heddlu Gwirfoddol)

Heddlu De Cymru yw’r heddlu mwyaf yng Nghymru ac er ei fod yn cwmpasu ardal ddaearyddol fach ag arwynebedd o tua 812 o filltiroedd sgwâr, sy’n cyfateb i ddim ond 10% o arwynebedd daearyddol Cymru, mae Heddlu De Cymru yn darparu gwasanaeth plismona i 1.3 miliwn o bobl (42% o boblogaeth y wlad).

Mae De Cymru yn rhanbarth amrywiol gydag ardaloedd gwledig, arfordirol a threfol gan gynnwys y ddwy ddinas fwyaf yng Nghymru, sef Abertawe a’r brifddinas, Caerdydd. Mae’r heddlu hefyd yn gwasanaethu 63 o’r 100 o gymunedau mwyaf difreintiedig yng Nghymru.

Fel heddlu, rydym yn buddsoddi'n sylweddol yn y dechnoleg ddiweddaraf ac yn llesiant staff a swyddogion. Mae Heddlu De Cymru wedi bod wrth wraidd llawer o ddigwyddiadau mawr – gyda Chynghrair y Pencampwyr, NATO a'r Gemau Olympaidd ymhlith eraill wedi eu cynnal yma yn Ne Cymru dros y blynyddoedd diwethaf.

Ymunwch â ni er mwyn ein helpu i fod y gorau am ddeall anghenion ein cymunedau ac ymateb iddynt.

Unwaith y byddwch yn llwyddiannus yn eich cais byddwch yn cwblhau rhaglen hyfforddiant cychwynnol rhan amser yn cynnwys addysgu ystafell ddosbarth, hyfforddiant ymarferol a dysgu o bell. Ar ôl hyn byddwch yn dechrau ar eich rôl fel cwnstabl gwirfoddol, yn gweithio ochr yn ochr â swyddog yr heddlu profiadol neu gwnstabl gwirfoddol nes eich bod yn barod i weithio’n annibynnol. Bydd disgwyl i chi ymrwymo i o leiaf 16 awr y mis am weddill eich gwasanaeth.

Yn ystod eich gwasanaeth byddwch yn delio ag amrywiaeth eang o ddigwyddiadau. Bydd adegau pan fyddwch yn profi gwrthdaro; byddwch yn arestio pobl dan amheuaeth a mynychu digwyddiadau sy’n aml yn ofidus, ond ni fydd popeth yn oleuadau glas a helfeydd mewn car.

Byddwch yno i bobl pan fydd eich angen arnynt fwyaf, bydd adegau pan na fyddwch yn gorffen eich sifft ar amser a phan fyddwch yn teimlo mai dim ond cwblhau gwaith papur rydych yn ei wneud. Ond os oes gennych yr ysfa i wneud gwahaniaeth yn eich cymuned byddwch yn cael budd o weithio ochr yn ochr â swyddogion llawn amser i wneud De Cymru yn fwy diogel.

Fel Cwnstabl Gwirfoddol, efallai y byddwch yn cael budd o gynllun Plismona a Gefnogir gan Gyflogwyr.

Mae Plismona a Gefnogir gan Gyflogwyr yn gynllun cenedlaethol a gefnogir gan y Swyddfa Gartref lle mae sefydliadau yn rhyddhau eu gweithwyr ar wyliau â thâl i wirfoddoli fel Cwnstabl Gwirfoddol neu fel Gwirfoddolwr Cefnogi'r Heddlu.

Mae'r bartneriaeth hon o fudd i gyflogwyr, eu staff, gwasanaeth yr heddlu a'r cymunedau maent yn eu gwasanaethu.

Ar hyn o bryd, mae dros 400 o gyflogwyr wedi cofrestru â'r cynllun.

Gwybodaeth am gyflog Cwnstabliaid Gwirfoddol

Ni chaiff Cwnstabliaid Gwirfoddol eu talu am eu bod yn gweithio ar sail wirfoddol. Fodd bynnag, gallwch wneud cais am unrhyw dreuliau yn ystod eich dyletswyddau er enghraifft treuliau teithio.

Pan fyddwch yn dod yn Gwnstabl Gwirfoddol, byddwch yn cael budd o'r canlynol:

• Aelodaeth â thâl i Ffederasiwn Heddlu Cymru a Lloegr.
• Gostyngiadau gan amrywiaeth o fanwerthwyr drwy'r Cynllun Golau Glas.
• Defnyddio clybiau Chwaraeon a Chymdeithasol
• Defnyddio campfeydd wedi'i sybsideiddio yn ardal yr heddlu.
• Defnyddio ein Gwasanaethau Iechyd Galwedigaethol a Llesiant. Defnyddio Vivup – ein gwasanaeth cymorth proffesiynol annibynnol 24 awr y dydd.
• Cymorth a chyngor gan ein Cymdeithasau a Rhwydweithiau Staff, gan gynnwys – Rhwydwaith Cydraddoldeb rhwng y Rhywiau, Rhwydwaith LHDT+, Cymdeithas yr Heddlu Du, Rhwydwaith Cymorth Anabledd, Rhwydwaith Niwroamrywiaeth, Cymdeithas Gristnogol yr Heddlu, Cymdeithas yr Heddlu Mwslimaidd.

Mae gan y Gwnstabliaeth Wirfoddol yn Heddlu De Cymru ei strwythur rhengoedd ei hun.

Caiff ei harwain gan Brif Swyddog y Gwnstabliaeth Wirfoddol, a gaiff ei gefnogi gan yr Uwch-arolygydd Gwirfoddol, Arolygwyr Gwirfoddol a Rhingylliaid Gwirfoddol.

Ar ôl i Gwnstabliaid Gwirfoddol gyflawni statws patrolio annibynnol, gallant ymgymryd â chyfrifoldebau ychwanegol drwy ddatblygu drwy'r rhengoedd.

Neu, gallant geisio arbenigo mewn maes plismona, fel yn ein Huned Plismona'r Ffyrdd.