Beth sy’n digwydd ar ôl i chi riportio bod person ar goll
Byddwn yn cysylltu â chi cyn gynted â phosib i sôn am yr hyn rydyn ni’n ei wneud.
Byddwn yn gofyn unrhyw gwestiynau ychwanegol angenrheidiol ac yn amlinellu beth fydd yn digwydd nesaf.
Bydd yr union gamau a gymerir yn dibynnu ar lefel y risg ac ar yr heddlu lleol. Ond, er enghraifft, ar ddechrau ymchwiliad, efallai y byddwn yn:
- chwilio cartref y person sydd ar goll (hyd yn oed os ydych chi wedi gwneud hynny eisoes)
- chwilio'r ardal lle cafodd ei weld ddiwethaf
- cysylltu â’r ysbytai lleol
- chwilio drwy ffôn symudol neu gyfrifiaduron y person sydd ar goll
- cnocio ar ddrysau’n lleol i weld a oes gan rywun unrhyw wybodaeth
- edrych ar luniau teledu cylch cyfyng
- cynnal archwiliadau arbenigol (er enghraifft gyda hofrennydd, cŵn neu ddeifwyr) os oes angen
Os nad ydym yn credu bod hwn yn achos o berson coll, byddwn yn:
- dweud wrthych pam
- eich rhoi mewn cysylltiad â’r bobl iawn yn hytrach na’r heddlu
Os bydd ymchwiliad yn croesi’r ffiniau rhwng heddluoedd (er enghraifft os aiff rhywun ar goll mewn un ardal ond o bosibl yn cael ei weld mewn ardal arall) bydd yr heddluoedd yn cydweithio.
Heddlu’r man y mae'r person ar goll ohono sydd â'r cyfrifoldeb cyffredinol fel arfer, ond gall hyn newid os yw'r rhan fwyaf o'r ymchwiliad yn digwydd mewn ardal wahanol.
Asesu risg
Ar ôl i chi riportio bod person ar goll, bydd ein tîm yn penderfynu a yw’r achos yn:
- risg uchel
- risg ganolig
- risg isel
- dim risg amlwg
Rydym yn ystyried llawer o ffactorau gan gynnwys oed ac iechyd wrth benderfynu ar risg. Bydd lefel y risg yn ein helpu i benderfynu beth i’w wneud nesaf. Mae croeso i chi ofyn am lefel y risg a dylech gael gwybod hynny.
Nid yw lefel y risg yn sefydlog a gellir ei hailasesu yn ystod yr ymchwiliad os oes gwybodaeth newydd yn dod i’r fei neu os yw’r amgylchiadau’n newid.
Beth allwch chi ei wneud nesaf
Os ydych chi’n cofio am unrhyw beth arall ar ôl riportio person ar goll, gallwch ffonio 101.
Tra byddwch chi’n aros i glywed yn ôl gennym, dyma rai pethau y gallwch chi eu gwneud i helpu i chwilio am berson ar goll.
Pan fydd rhywun wedi bod ar goll am gyfnod
Mae’r rhan fwyaf o bobl sydd ar goll yn cael eu canfod neu’n dychwelyd o fewn yr ychydig ddyddiau cyntaf.
Os bydd person ar goll am fwy nag ychydig ddyddiau, bydd ymchwiliad yr heddlu yn newid.
Darganfod beth sy’n digwydd pan fydd rhywun wedi bod ar goll am fwy nag ychydig ddyddiau.
Cymorth a chefnogaeth
Gall yr elusen Missing People eich cefnogi a’ch helpu i ymdopi pan fydd rhywun wedi mynd ar goll.
Mae LBT Global (Ymddiriedolaeth Lucie Blackman gynt) yn helpu pobl pan fydd person wedi mynd ar goll mewn gwlad dramor.
Os ydych chi'n poeni am les rhywun, dyma ragor o wybodaeth am sut gallwn ni neu sefydliadau eraill helpu.