Beth sy’n digwydd pan fydd rhywun wedi bod ar goll am fwy nag ychydig ddyddiau

Mae’r rhan fwyaf o bobl sydd ar goll yn cael eu canfod neu’n dychwelyd o fewn yr ychydig ddyddiau cyntaf.

Os bydd person ar goll am fwy nag ychydig ddyddiau, efallai bydd ymchwiliad yr heddlu yn newid rhywfaint.

Swyddogion Cyswllt Teulu

Weithiau byddwn yn neilltuo Swyddog Cyswllt Teulu mewn achos o berson ar goll.

Bydd y Swyddog Cyswllt Teulu:

• yn un pwynt cyswllt cyson
• yn rhoi cymorth a gwybodaeth i chi am yr ymchwiliad
• yn helpu i wneud yn siŵr bod gennym yr holl wybodaeth sydd ei hangen arnom gennych chi
• Nid ydym yn neilltuo Swyddog Cyswllt Teulu i bob achos. Os nad ydych yn cael Swyddog Cyswllt Teulu, siaradwch â ni i gael gwybod sut a pha mor aml y gallwch ddisgwyl clywed gennym i drafod yr ymchwiliad.

Deunydd fforensig

Os nad ydyn ni wedi gwneud hynny’n barod, efallai y byddwn yn casglu olion bysedd neu eitemau y gallwn ni gael sampl DNA ohonynt fel brwsh dannedd neu frwsh gwallt.

Gall hyn fod o gymorth os byddwn yn dod o hyd i berson anhysbys a allai fod y person yr ydych yn chwilio amdano.

I helpu i gynnal a chadw DNA y person coll, peidiwch â tharfu’n ormodol ar ei ystafell a’i bethau. Peidiwch â golchi na glanhau unrhyw beth, na chyffwrdd ei frwsh gwallt na’i frwsh dannedd nes ein bod wedi chwilio a chasglu tystiolaeth.

Os na allwn gael sampl DNA ar gyfer y person coll, efallai y byddwn yn gofyn am gael casglu sampl DNA gennych chi ac aelodau eraill o’r teulu.

Cedwir gwybodaeth DNA mewn achosion o unigolion coll ar gronfa ddata a reolir gan Uned Pobl Goll y DU. Dim ond er mwyn helpu i adnabod y person coll y caiff y wybodaeth hon ei defnyddio ac nid at unrhyw ddibenion eraill. Ar ôl dod o hyd i’r person coll, bydd y wybodaeth yn cael ei dileu.

Efallai y byddwn hefyd yn gofyn am fanylion deintydd neu feddyg y person coll, er mwyn i ni allu gofyn am gofnodion deintyddol a chofnodion meddygol eraill. Efallai y byddwn yn gofyn am eich caniatâd chi os mai chi yw eu perthynas agosaf.

Yr Uned Pobl Goll y DU

Ar ôl tri diwrnod (72 awr) rhaid i’r heddlu sy’n gweithio ar achos person coll ddweud wrth yr Uned Pobl Goll y DU. Mae’r Uned Pobl Goll y DU yn rhan o’r Asiantaeth Troseddu Cenedlaethol (NCA).

Yr Uned Pobl Goll y DU:

• yn gwneud ymholiadau ar ran heddluoedd lleol
• yn darparu cyngor a chefnogaeth arbenigol i heddluoedd lleol
• yn cadw cronfa ddata o bobl ar goll a’r rheini sydd wedi’u canfod yn y DU. Mae hyn yn helpu pan fydd rhywun yn cael ei ganfod y tu allan i ffiniau’r heddlu lleol lle’r oedd y person ar goll
• yn rheoli cronfeydd data fforensig ar gyfer proffiliau DNA ac olion bysedd mewn ymchwiliadau pobl ar goll

Gall yr heddlu lleol gael cymorth gan yr Uned Pobl Goll y DU cyn y tri diwrnod arferol, er enghraifft os ydynt yn amau trosedd difrifol.

Gall heddlu lleol hefyd gael cymorth arbenigol gan Uned Ymchwilio i Droseddau Difrifol (MCIS) yr Asiantaeth Troseddu Cenedlaethol.

Cymorth a chefnogaeth

Mae’n naturiol i boeni’n ofnadwy pan nad yw’r person yn dychwelyd yn sydyn. Gall yr elusen Missing People eich cefnogi a’ch helpu i ymdopi.

Gwefan Missing People 

Mae Ymddiriedolaeth Lucie Blackman yn helpu pobl pan fydd person wedi mynd ar goll mewn gwlad dramor.

LBT Global