Beth allwch chi ei wneud i helpu i ddod o hyd i berson sydd ar goll
Chwilio am y person coll
Os nad ydych chi wedi gwneud hynny’n barod, dylech:
- chwilio'r cartref neu lle bynnag y cafodd ei weld ddiwethaf
- chwilio'r atig, yr ardd, y sied neu'r garej
- cofiwch y gall plant ffitio ym mhob twll a chornel
- chwilio am nodyn neu lythyr
- chwilio am gliwiau ynghylch unrhyw fwriad oedd ganddo, er enghraifft a yw wedi mynd â’i basbort neu wedi pacio bag
- chwilio drwy eich e-bost a’ch ffôn am negeseuon
- ffonio ffrindiau a theulu
Ysbytai
Os yw unigolyn wedi cael damwain a’i fod yn anymwybodol, efallai na fydd yr ysbyty’n gwybod pwy ydyw na phwy y dylid cysylltu â nhw.
Gallech ffonio’r ysbytai lleol i weld a oes unrhyw un wedi cyrraedd yn ddiweddar nad yw’r ysbyty’n gwybod pwy ydynt. Holwch ni’n gyntaf oherwydd efallai ein bod wedi gwneud hyn yn barod.
Gweithio gyda’r heddlu
Os ydych chi eich hun yn chwilio am y person coll, cofiwch ddweud hynny wrthym fel ein bod ni’n gwybod beth rydych chi’n ei wneud.
Peidiwch â rhoi eich hun mewn perygl
Er enghraifft, gadewch i'r heddlu fynd i chwilio mewn lleoedd arbenigol, fel yn y mynyddoedd neu mewn dŵr.
I’n helpu ni:
- gwnewch nodiadau o bopeth rydych chi’n ei wneud fel y gallwch sôn wrth yr heddlu sy’n gweithio ar yr achos. Gallwch hefyd wneud nodyn o’r cwestiynau yr hoffech eu gofyn
- peidiwch â tharfu ar ystafell wely’r person coll na’i bethau personol. Peidiwch â golchi na glanhau unrhyw beth nes ein bod wedi chwilio a chasglu tystiolaeth
- peidiwch â chyffwrdd â’i frwsh gwallt na’i frwsh dannedd. Efallai y byddwn am gasglu sampl DNA oddi arnynt, rhag ofn bydd y person ar goll am amser hir
Posteri a chyhoeddusrwydd arall
Os yw’r person wedi bod ar goll ers tro, efallai y byddwch yn dewis gosod posteri neu greu cyhoeddusrwydd arall, er enghraifft ar y cyfryngau cymdeithasol.
Posteri am bobl ar goll a chyhoeddusrwydd arall
Edrych ar ôl eich hun
Pan fydd rhywun agos atoch chi’n mynd ar goll, mae’n gallu bod yn brofiad trawmatig iawn. Gofalwch amdanoch chi eich hun a’ch teulu, a gofynnwch i bobl eraill am help.
Gall yr elusen Missing People eich cefnogi a’ch helpu i ymdopi pan fydd rhywun wedi mynd ar goll. Mae eu llinell ffôn ar agor 24 awr y dydd - 116 000.
Ar goll mewn gwlad dramor
Bydd pethau’n wahanol os yw’r person wedi mynd ar goll mewn gwlad arall.