Pornograffi dial
Mae'n anghyfreithlon rhannu neu fygwth rhannu lluniau neu fideos preifat, rhywiol o rywun heb eu caniatâd.
Yr enw ar hyn yw cam-drin drwy ddelweddau personol neu bornograffi dial, ac mae’n cynnwys:
- uwchlwytho delweddau i'r rhyngrwyd
- eu rhannu drwy neges destun neu ebost
- dangos delwedd ffisegol neu electronig i rywun
Ystyr ‘preifat’ yw unrhyw beth nad yw fel arfer yn cael ei weld yn gyhoeddus. Yn ôl y gyfraith, ystyr ‘rhywiol’ yw unrhyw beth sy'n dangos organau rhywiol neu fannau preifat person ac unrhyw beth arall y mae 'person rhesymol' o’r farn ei fod yn rhywiol.
Gall unrhyw un ddioddef camdriniaeth drwy ddelweddau personol. Bydd y troseddwr yn aml yn gyn-bartner neu'n rhywun rydych chi'n ei adnabod, ond gall hefyd fod yn ddieithryn.
Beth i'w wneud os ydych chi wedi cael eich targedu
- Cadwch eich pen, heb fynd i banig: mae help a chefnogaeth ar gael.
- Cadwch y dystiolaeth; casglwch ddolenni URL i ble mae'r wybodaeth yn cael ei rhannu ar-lein.
- Rhwystrwch yr holl gyfathrebu â'r person sy'n eich targedu.
- Riportiwch unrhyw gyfrifon mae'r person wedi'u defnyddio i gysylltu â chi neu i rannu'r deunydd arnyn nhw.
Mae gan y rhan fwyaf o wefannau yn y cyfryngau cymdeithasol reolau yn erbyn rhannu cynnwys personol heb gydsyniad, felly fe ddylech chi allu trefnu bod y deunydd yn cael ei ddileu. Gall y Llinell Gymorth Pornograffi Dial eich helpu i riportio’r deunydd i gyfrifon cyfryngau cymdeithasol.
Riportiwch y peth
Rydyn ni’n deall y gall fod yn anodd riportio’r math hwn o drosedd inni, ond mae’n swyddogion ni yma i wrando ac i'ch cefnogi mewn unrhyw ffordd y gallwn.
Gallwch riportio cam-drin drwy ddelweddau personol inni:
- ar-lein
- drwy alw 101
- drwy fynd i orsaf heddlu
- os oes gennych chi nam ar y clyw neu'r lleferydd, defnyddiwch ein gwasanaeth ffôn testun ar 18001 101.
Cysylltiadau defnyddiol
Oedolion (18 a throsodd)
Llinell Gymorth Pornograffi Dial
Cyngor a gwybodaeth a help i ddileu delweddau.
Yn agored rhwng 10am a 4pm, o ddydd Llun i ddydd Gwener.
Gallwch hefyd gysylltu â nhw'n ddienw i ddechrau drwy ddefnyddio eu Whisper Report.
Mae'r gwasanaeth Llinell Gymorth Pornograffi Dial ar gyfer oedolion (18 oed a throsodd) yn unig.
Plant (o dan 18)
Childline
Help a chyngor i’r rhai o dan 18 oed. Gall Childline eich helpu i dynnu delweddau sydd wedi’u rhannu oddi ar y rhyngrwyd.
Internet Watch Foundation
Riportio lluniau neu fideos cam-drin plant yn rhywiol ar y rhyngrwyd, a hynny’n ddienw ac yn gyfrinachol.
Canolfan Camfanteisio ar Blant a'u Hamddiffyn Ar-lein
Riportiwch gamdriniaeth rywiol plant ar-lein i ganolfan Camfanteisio ar Blant a'u Hamddiffyn Ar-lein yr heddlu.