Beth yw cam-drin domestig?
Y diffiniad cyfreithiol o gam-drin domestig yw: unrhyw ddigwyddiad o ymddygiad sy’n rheoli, gorfodi neu’n fygythiol, trais neu gamdriniaeth rhwng rhai 16 oed neu hŷn sydd â ‘chysylltiad personol’, waeth beth fo’u rhyw neu rywioldeb.
Gall cam-drin domestig fod yn, ond nid yw’n gyfyngedig i, gam-drin:
- corfforol
- emosiynol
- seicolegol
- rhywiol
- ariannol
Mae enghreifftiau o bobl sydd â ‘chysylltiad personol’ yn cynnwys:
- perthnasau, gan gynnwys hanner-perthnasau a llys-berthnasau
- parau priod, neu barau oedd yn arfer bod yn briod
- partneriaid sifil, neu gynbartneriaid sifil
- pobl sydd wedi cytuno i briodi, neu ymrwymo i gytundeb partneriaeth sifil â’i gilydd
- pobl sydd wedi cael perthynas agos â’i gilydd
- pobl sy’n rhiant i’r un plentyn, neu sydd wedi bod â chyfrifoldeb rhiant dros yr un plentyn
Mae cam-drin domestig hefyd yn cynnwys cam-drin ar sail anrhydedd a phriodas dan orfod.
Mae gan wefan Gwasanaeth Erlyn y Goron ddadansoddiad o'r mathau o gamdriniaeth ddomestig.
Mae un digwyddiad yn unig yn cyfrif fel camdriniaeth.
Gall camdriniaeth ddomestig effeithio ar unrhyw un waeth beth fo'u hethnigrwydd, eu hoed, eu rhyw, eu rhywioldeb neu eu cefndir cymdeithasol.
Os ydych chi’n dioddef camdriniaeth gorfforol, rywiol, seicolegol neu ariannol, neu'n cael eich bygwth, eich brawychu neu’ch stelcio gan bartner presennol neu flaenorol neu aelod agos o'r teulu, mae'n debygol eich bod yn dioddef camdriniaeth ddomestig.
Nid chi sydd ar fai am beth sy'n digwydd. Dydych chi ddim ar eich pen eich hun.
Gallwch riportio hyn i ni neu, os nad ydych chi’n barod i siarad â'r heddlu, gallwch gysylltu â sefydliadau cymorth a fydd yn eich helpu.
Mae gennyn ni restr o sefydliadau cymorth cenedlaethol a lleol a all helpu.