Defnyddio Pwerau'r Heddlu
Heddlu De Cymru yw'r heddlu prysuraf yng Nghymru. Mae'n darparu gwasanaeth plismona i 1.3 miliwn o bobl – 42% o boblogaeth Cymru, gan reoli tua 43% o gyfanswm nifer y troseddau yng Nghymru.
Oherwydd natur eu gwaith, mae swyddogion yr heddlu yn gorfod delio'n achlysurol ag amgylchiadau lle mae'n briodol defnyddio pwerau stopio a chwilio. Gall defnyddio'r pwerau hyn yn gyfreithlon atal digwyddiadau mwy difrifol neu atal niwed i'r cyhoedd a'r unigolyn dan sylw. Mae'n bwysig nodi bod y mwyafrif helaeth o achosion o rym a ddefnyddir yn Ne Cymru yn cynnwys cyfathrebu tactegol geiriol a rhoi gefynnau ar ddwylo pobl sy'n cael eu harestio.
Mae ein swyddogion yn wynebu sefyllfaoedd anodd bob dydd.
Diolch byth, dim ond mewn nifer bach o'r sefyllfaoedd hyn y bydd yn rhaid i swyddogion yr heddlu ddefnyddio grym, boed hynny i ddiogelu'r cyhoedd, cadw trefn neu gadw eu hunain rhag niwed.
Cânt eu hyfforddi'n helaeth i ddefnyddio'r grym hwn yn gymesur, yn gyfreithlon a dim ond pan fydd yn gwbl angenrheidiol.
Mae'r mathau o rym y gall yr heddlu eu defnyddio yn cynnwys:
Gefynnau
Chwistrellwyr llidiog
Gynnau Taser*
Batonau
Arfau tanio*
Defnyddio ci
*Gall y defnydd o ynnau taser ac arfau tanio gynnwys adegau pan fyddant wedi'u hanelu at rywun, ond heb eu tanio.
Defnydd Heddlu De Cymru o rym rhwng Gorffennaf i Medi 2022
Gall swyddog yr heddlu neu swyddog cymorth cymunedol yr heddlu mewn iwnifform eich stopio chi ond dim ond swyddogion yr heddlu all gynnal chwiliad corfforol. Nid oes rhaid i swyddogion yr heddlu fod mewn iwnifform ond mae'n rhaid iddynt ddangos ei gerdyn gwarant i chi. Gallant gynnal chwiliad corfforol neu chwiliad o unrhyw beth rydych yn ei gario a cherbyd.
Efallai y dewch ar draws achosion gwahanol o stopio. Er mwyn cael mwy o wybodaeth am yr hyn a fydd yn digwydd, cliciwch yma.
I gael cysylltiadau mwy defnyddiol, gweler y canlynol:
Pam rydym yn defnyddio stopio a chwilio
Eich hawliau a'ch cyfrifoldebau
Sut rydym yn defnyddio stopio a chwilio
Ystadegau a data
Ar gyfer data stopio a chwilio Heddlu De Cymru, cliciwch yma.
Ar gyfer data stopio a chwilio eich ardal leol, cliciwch yma.
Craffu
Mae proses graffu fewnol gadarn a chynhwysfawr ar y Defnydd o Rym a Stopio a Chwilio ar waith yn Heddlu De Cymru. Mae hyn yn cynnwys gweithio'n agos gyda rhanddeiliaid, gan gynnwys grwpiau cydlyniant cymunedol, er mwyn sicrhau ein bod mor agored a thryloyw â phosibl am ein dulliau plismona.
Croesewir proses graffu allanol drwy'r defnydd o Grŵp Cynghori Annibynnol yr Heddlu ac aelodau o Grŵp Atebolrwydd a Dilysrwydd Plismona (PALG) Comisiynwyr yr Heddlu a Throseddu. Mae'r grwpiau hyn yn adolygu ffilmiau o gamerâu fideo wedi'u gwisgo ar y corff o achosion o Stopio a Chwilio ac achosion lle defnyddiwyd grym unwaith bob chwarter o leiaf. Caiff adborth o'r sesiynau hyn ei gasglu a gweithredir arno i wella ein safonau a sicrhau bod ein gwaith plismona yn deg a moesegol.
Grŵp Cynghori Annibynnol Heddlu De Cymru
Mae Grŵp Cynghori Annibynnol yr Heddlu yn cynnwys 28 o drigolion o bob rhan o Dde Cymru. Mae gan yr aelodau hyn rôl allweddol o ran gwella ymddiriedaeth a hyder y cyhoedd yn yr heddlu. Mae Gwpiau Cynghori Annibynnol yn annibynnol ar yr heddlu ond yn gweithredu fel ‘cyfeillion beirniadol’ er mwyn helpu i herio ffyrdd confensiynol o feddwl yn yr Heddlu a chynnig safbwynt annibynnol ar faterion cyfredol a ffyrdd o feddwl yn y dyfodol.
Mae Grwpiau Cynghori Annibynnol yn gweithio fel partneriaid gwirioneddol gyda'r Heddlu er mwyn gwella'r ffordd y caiff gwasanaethau eu darparu, gan ganolbwyntio'n benodol ar amrywiaeth a'r nodweddion gwarchodedig. Caiff pob un o'r naw nodwedd warchodedig eu cynrychioli drwy ein Grŵp Cynghori Annibynnol presennol, a hynny ar lefel bersonol a phroffesiynol.
Mae aelodau'r Grŵp Cynghori Annibynnol yn rhoi o'u hamser i sicrhau bod yr Heddlu'n darparu gwasanaeth o safon. Cânt eu cefnogi gan aelodau o Dîm Cydraddoldeb, Amrywiaeth a Chynhwysiant yr heddlu. Oherwydd natur gyfrinachol y gwaith maent yn rhan ohono, caiff holl aelodau'r Grŵp Cynghori Annibynnol eu fetio at ddibenion diogelwch.
Grŵp Atebolrwydd a Dilysrwydd Plismona (PALG) Comisiynwyr yr Heddlu a Throseddu
Mae Grŵp Atebolrwydd a Dilysrwydd Plismona yn galluogi sefydliadau allanol ac ymgynghorwyr annibynnol i fod yn gyfeillion beirniadol i Heddlu De Cymru, gan helpu'r Comisiynydd Heddlu a Throseddu yn ei rôl graffu, a sicrhau bod Heddlu De Cymru yn atebol ac yn dryloyw.
Adolygwyd ddiwethaf: Mai 2022