Cadw’n ddiogel rhag terfysgaeth

Diolch i’r drefn, mae ymosodiadau gydag arfau tanio neu arfau eraill yn brin iawn yn y DU, ond mae digwyddiadau trasig o bob rhan o’r byd yn ein hatgoffa o’r angen i fod yn barod bob amser.

Mae’r ffilm hon yn rhoi cyngor ynghylch beth i’w wneud pe bai achos annhebygol o ymosodiad ag arfau tanio yn digwydd, naill ai yn eich gweithle neu yn rhywle arall. Dylech weld hyn fel cyfle i gynllunio sut y byddech chi’n ymateb i fygythiad o’r fath ac aros yn ddiogel.

[Mark Rowley:]

“Mae Stay Safe yn ffilm sy’n seiliedig ar gyngor profedig ac mae eisoes wedi’i gweld gan dros 100,000 o bobl ledled y wlad mewn sesiynau hyfforddi a briffio gyda’r sector preifat.

“Ar hyn o bryd mae’r lefel bygythiad wedi’i gosod ar ‘difrifol’, sy’n golygu bod ymosodiad yn debygol iawn. Yn wir mae wedi bod ar y lefel honno ers dros flwyddyn ac oherwydd hynny rydym wedi dwysau ein hymdrechion trwy, er enghraifft, wneud arestiad y dydd.

“Mae pawb yn ymwybodol o’r heriau terfysgol ledled y byd ac mae rhai ymosodiadau ofnadwy wedi digwydd. Ein barn ni yw y dylid cyflwyno’r cyngor hwn i’r cyhoedd fel, os bydd unrhyw un yn cael ei ddal mewn ymosodiad gwyllt gydag arfau tanio neu arfau eraill, eu bod yn fwy gwybodus nawr, ac yn cael cyngor gwell ar sut i amddiffyn eu hunain. Nid yw’n gallu darparu ar gyfer pob posibilrwydd ac os yw rhywun yn gweithredu ar reddf ac efallai’n penderfynu ymladd oherwydd nad oes ganddynt ddewis, yna wrth gwrs ni fyddem byth yn eu beirniadu am wneud hynny”.

Os clywch ergydion gwn yr opsiwn gorau yw gadael, ond gwnewch hynny dim ond os na fydd hynny’n eich rhoi mewn mwy o berygl.

Yn gyntaf, meddyliwch am eich llwybr.

Gweithredwch yn gyflym ac yn dawel gan adael eich eiddo ar ôl.

Mynnwch fod eraill ddod gyda chi, ond peidiwch â gadael i’w petruster hwy eich arafu chi.

Ar ôl i chi nodi llwybr diogel, rhedwch.

Ystyriwch eich llwybr wrth i chi adael:

• A fydd yn eich rhoi yn llwybr y saethu?
• A yw’n fwy diogel aros i’r ymosodwr symud i ffwrdd cyn i chi barhau?
• Os na allwch symud i le diogel, cuddiwch.

Wrth ddod o hyd i fan cuddio, ystyriwch eich allanfeydd a’ch llwybrau dianc. Osgowch ffyrdd nad oes ffordd allan ohonynt a mannau cyfyng.

• Ceisiwch ddod o hyd i leoedd gyda waliau wedi’u hatgyfnerthu.
• Ceisiwch gloi’ch hun mewn ystafell a symud oddi wrth y drws.
• Byddwch mor dawel â phosibl.
• Trowch eich ffôn symudol i’r modd tawel, a diffoddwch yr elfen dirgrynu.
• Peidiwch â gweiddi am help na gwneud unrhyw beth a fydd yn datgelu eich man cuddio.

Bydd gan y man cuddio gorau rwystr ffisegol sylweddol rhyngoch chi a’r ymosodwr.

• Os ydych chi’n gallu gadael, ewch mor bell â phosibl o’r ardal beryglus.
• Ceisiwch atal eraill rhag mynd i mewn, ond dim ond os na fydd hyn yn eich rhoi chi mewn perygl.

Ffoniwch yr heddlu.

Deialwch 999 a dywedwch yn glir wrthynt ble rydych chi a’r ymosodwyr, disgrifiadau o’r ymosodwyr, eu dillad a’u harfau, gwybodaeth am unrhyw rai sydd wedi’u hanafu a mynediad i’r adeilad.

Cynhwyswch unrhyw beth arall rydych chi’n meddwl sy’n bwysig.

Pan fydd yr heddlu’n cyrraedd, byddant wedi’u harfogi.

Efallai y byddant wedi’u gwisgo’n wahanol, yn dibynnu ar eu swyddogaeth.

• Eu tasg gyntaf fydd delio â’r bygythiad uniongyrchol i atal rhagor o anafusion.
• Gall hyn gymryd amser hir.
• Efallai na fydd yr heddlu’n gallu gwahaniaethu rhyngoch chi a’r ymosodwr.
• Efallai y byddant yn eich trin yn gadarn.
• Gwnewch bopeth maent yn ei ddweud wrthych am wneud.
• Peidiwch â gwneud unrhyw symudiadau neu ystumiau sydyn a allai gael eu hystyried yn fygythiad.
• Arhoswch yn dawel, peidiwch â gweiddi na chwifio eich breichiau.
• Cadwch eich dwylo’n weladwy bob amser fel y gallant weld nad ydych chi wedi’ch arfogi.
• Gall yr heddlu arfog ofyn am fanylion am yr adeilad, yr ymosodwyr, y gwystlon, a’r anafusion.

Dim ond unwaith y bydd yn ddiogel gwneud hynny y byddwch chi’n cael eich symud i ddiogelwch.

Mae ymosodiadau gydag arfau tanio ac arfau yn brin iawn; bydd cael cynllun yn eich helpu i aros yn ddiogel a gallai achub eich bywyd.