Dyn wedi'i garcharu am lofruddio 'merch ac aelod annwyl o deulu, a ffrind hoffus'

 

Mae dyn wedi cael ei garcharu am ddedfryd o oes ar ôl iddo gyfaddef ei fod wedi llofruddio ei wraig a oedd yn gwahanu oddi wrtho.

Gan ymddangos gerbron Llys y Goron Gaerdydd heddiw (20 Chwefror), cafodd Thisara Weragalage, 38 oed, o Bentwyn, ddedfryd o oes ag isafswm o 23 o flynyddoedd ac naw mis am lofruddio Nirodha Niwunhella.

Plediodd Weragalage yn ddieuog i ddechrau, ond newidiodd ei ble a chafodd ei euogfarnu yn Llys y Goron Caerdydd ar 16 Ionawr, 2026.

Roedd Niwunhellage Dona Nirodha Kalapni Niwunhella yn 32 oed ac yn defnyddio'r enw Nirodha, a thalodd ei theulu deyrnged iddi ar adeg ei marwolaeth.

Gwnaethant ddweud:

"Rydym yn cofio Nirodha fel merch ac aelod annwyl o'r teulu a ffrind hoffus i lawer. Caiff Nirodha ei chofio am byth â heddwch, cariad a diolch.

"Cafodd ei charedigrwydd a'i chynhesrwydd ddylanwad ar lawer o fywydau a bydd ein hatgofion amdani yn parhau i'n hysbrydoli. Er i'w bywyd ddod i ben yn rhy gynnar, bydd y cariad a rannodd yn parhau am byth.

"Gorffwys mewn hedd, angel."

 

Yn ei ddatganiad personol dioddefwr a ddarllenwyd yn uchel yn y llys, dywedodd ei thad:

“Nirodha Kalpani Niwunhella oedd fy unig ferch. Roedd hi'n ferch hapus, ddireidus a chwareus a gipiodd galonnau pawb pan oedd hi'n blentyn. Roedd hi'n caru ei mam a'i thad yn fawr ac roedd yn gyfaill da iawn i'w ffrindiau. Roedd hi'n ferch hyfryd a oedd hefyd yn hoff iawn o anifeiliaid.”

Aeth yn ei flaen:

“Rwy'n 64 oed ac mae fy ngwraig hefyd yn 64 oed. Does dim geiriau i ddisgrifio'r boen a'r gwewyr meddwl y gwnaethom eu teimlo pan gawsom wybod ar 21 Awst fod ein merch wedi cael ei llofruddio. Ar ôl llofruddiaeth erchyll ein hunig ferch, cafodd pob gobaith a oedd gennym ei ddinistrio. Mae ei cholled yn faich meddwl annioddefol i'r teulu.

“Gwnaethom wynebu llawer o broblemau gan fod y drosedd hon wedi'i chyflawni dramor. Achoswyd problemau pellach yn sgil yr anawsterau cyfathrebu a chaledi economaidd. Gwnaethom ddioddef loes a gofid meddwl pellach ar ôl i ni gael cadarnhad mai gŵr ein merch wnaeth gyflawni'r drosedd hon. Nid ydym yn gallu deall sut y gallai fod wedi cyflawni'r drosedd erchyll hon, gan ein bod ni yn ei garu ef hefyd llawn cymaint ag yr oeddem yn caru ein merch.”

Cafodd swyddogion eu galw i South Morgan Place, yn ardal Glan yr Afon yng Nghaerdydd, am 7.37am ar 21 Awst, ar ôl cael gwybod am fenyw a oedd wedi'i hanafu'n ddifrifol. Fel rhan o'r ymholiadau dilynol, daethpwyd o hyd i lafn a charn cyllell gerllaw, a dangosodd awtopsi fod Nirodha wedi cael ei thrywanu o leiaf 20 gwaith.

Aeth swyddogion yr heddlu a gyrhaeddodd y safle gyntaf ati ar unwaith i roi cymorth cyntaf, a daeth parafeddygon i roi cymorth yn fuan wedi hynny. Yn anffodus, er gwaethaf eu hymdrechion gorau, bu farw Nirodha yn y fan a'r lle.

Yn ôl yr hyn a ddywedodd tystion wrth swyddogion, gwelwyd dyn, y cadarnhawyd bellach mai Weragalage ydoedd, yn ffoi o'r safle mewn Ford Fiesta. Nododd ymholiadau CCTV llwybr carlam dilynol fod y cerbyd wedi'i gofrestru i Weragalage.

Lai nag awr yn ddiweddarach, cafodd swyddogion alwad lles gan y gwasanaeth ambiwlans, yn dilyn digwyddiad ar Seawall Road. Aeth swyddogion i'r lleoliad, a nodwyd bod y dyn yn cyfateb i'r disgrifiad o'r person a oedd o ddiddordeb mewn perthynas â marwolaeth Nirodha. Ar ôl chwilio'r ardal gyfagos, daethpwyd o hyd i'r Ford Fiesta, â gwaed y tu mewn iddo, a chafodd Weragalage ei arestio ar amheuaeth o lofruddiaeth.

Dywedodd yr Uwch-swyddog Ymchwilio, y Ditectif Arolygydd Graham Williams: “Roedd teulu a ffrindiau Nirodha yn ei charu'n fawr, a chafodd ei bywyd ei ddiweddu gan ei chyn-bartner cenfigennus a llwfr. Roedd Nirodha wrthi'n gwahanu oddi wrth Weragalage, na allai dderbyn nad oedd Nirodha am fod mewn perthynas ag ef mwyach. Daeth â chyllyll i'r ardal, er mwyn codi ofn arni y dywedodd, ac wedyn aeth ymlaen i'w llofruddio.

“Rwy'n falch iddo gyfaddef i'w weithredoedd llwfr, gan atal anwyliaid Nirodha rhag gorfod dioddef treial. Er na all unrhyw ddedfryd wneud iawn am y golled hon, gobeithio y bydd diwedd yr achos troseddol yn helpu i roi rhywfaint o heddwch iddynt.

“Mae'r ddedfryd hon yn deillio o oriau gwaith di-rif gan dimau o bob rhan o'r heddlu, a hoffwn ddiolch i bawb a fu'n rhan o'r broses am eu hamser a'u hymdrechion i sicrhau'r rheithfarn hon. Hoffwn ddiolch hefyd i'r unigolion hynny o'r gymuned a wnaeth gynorthwyo ym mhob rhan o'n hymchwiliad.

“Nid ydym yn goddef unrhyw fath o drais, gan gynnwys trais yn erbyn menywod a merched gan ddynion, a byddwn yn gwneud popeth yn ein gallu i ddwyn y rhai hynny sy'n gyfrifol i gyfrif.”

Nid ydym byth yn diystyru pa mor anodd yw hi i trais domestig siarad yn agored a rhoi gwybod am ddigwyddiadau o'r fath. Gall trais domestig effeithio ar unrhyw un ni waeth beth fo'u hethnigrwydd, oed, rhywedd, rhywioldeb, neu gefndir cymdeithasol.

Os ydych chi'n cael eich cam-drin yn gorfforol, yn rhywiol, yn seicolegol neu'n ariannol, neu'n cael eich bygwth neu eich stelcio gan bartner presennol neu gyn-bartner, neu aelod agos o'r teulu, mae'n debygol eich bod yn dioddef cam-drin domestig. Nid chi sydd ar fai am yr hyn sy'n digwydd. Dydych chi ddim ar eich pen eich hun.

Gallwch roi gwybod i ni am gam-drin domestig ar-lein, ffonio 101, neu os bydd trosedd yn mynd rhagddi neu os bydd rhywun mewn perygl uniongyrchol, ffoniwch 999. Gallwch hefyd roi gwybod i Crimestoppers yn ddienw ar 0800 555 111

I gael rhagor o wybodaeth am arwyddion cam-drin domestig, ewch i Beth yw cam-drin domestig? | Heddlu De Cymru. Dewch o hyd i ddolenni i gymorth lleol yn eich ardal yma Sefydliadau cymorth ar gyfer dioddefwyr cam-drin domestig | Heddlu De Cymru