Carcharu dyn o Gastell-nedd ar ôl cyfres o droseddau rhywiol a threisgar
Cynnwys y prif erthygl
Mae dyn o Gastell-nedd Port Talbot wedi cael ei garcharu ar ôl iddo gael ei ddyfarnu'n euog o droseddau rhywiol a threisgar.
Gwnaeth Simon Morgan, 40 oed o Gastell-nedd, dreisio'r dioddefwr ym mis Gorffennaf 2021. Yna, roedd yn gwrthod gadael cyfeiriad y dioddefwr am sawl awr nes i'r dioddefwr alw'r heddlu.
Mewn digwyddiad ar wahân, yn dilyn dadl, taflodd Morgan ei ddioddefwr ar y soffa ac ar y llawr. Wrth i'r dioddefwr geisio gadael, gwthiodd Morgan y dioddefwr i'r llawr ac yna stampio ar ben y dioddefwr sawl gwaith.
Plediodd Morgan yn ddieuog i gyhuddiadau o dreisio, ymddygiad rheoli gorfodaethol ac achosi niwed corfforol gwirioneddol, ond cafwyd ef yn euog ar ôl treial ym mis Medi 2024.
Mae wedi cael ei ddedfrydu i 14 blynedd yn y carchar.
Dywedodd y Ditectif Arolygydd Sharon Gill-Lewis:
“Cynhaliodd Simon Morgan ymgyrch o drais a dychryn yn erbyn ei ddioddefwr ac ar bob cam gwyddai fod ei ymddygiad yn debygol o gael effaith ddifrifol ar lesiant y dioddefwr.
“Ers gormod o amser, mae'r dioddefwr wedi byw mewn ofn o Simon Morgan. Rydym yn gobeithio y bydd y newyddion y bydd yn y carchar am nifer o flynyddoedd o leiaf yn galluogi'r dioddefwr i gael rhywfaint o gysur wrth geisio gwella o'r profiad dychrynllyd hwn.
“Hoffwn ddiolch i'r Ditectif Gwnstabl Emma Robbins am ei gwaith diflino yn yr ymchwiliad hwn, ac wrth sicrhau cyfiawnder hirddisgwyliedig i'r dioddefwr.”
Am wybodaeth am roi gwybod am droseddau rhywiol, gweler yma: Rhoi gwybod am droseddau rhywiol: Gwybodaeth a chanllaw ategol | Heddlu De Cymru
Mae menywod a merched yn dioddef achosion o drais a cham-drin i raddau anghymesur, a gallant ddioddef dan ddwylo partner, cyn-bartner neu aelod o'r teulu a dieithryn weithiau.
Mae Heddlu De Cymru wedi gweithio gyda menywod a merched sy'n byw yn Ne Cymru ac wedi rhannu eu profiadau bywyd drwy ymgyrch Gweld Fi. Nod yr ymgyrch yw codi ymwybyddiaeth ac annog pawb i wrthwynebu pob math o gam-drin, a dwyn y rhai sy'n cam-drin i gyfrif er mwyn i ni allu sicrhau bod gennym gymdeithas lle mae menywod a merched yn ddiogel.