Llinell stori 'dorcalonnus' rhaglen deledu yn archwilio effaith cam-drin domestig

Os ydych yn wyliwr Emmerdale, byddwch yn ymwybodol o linell stori Belle King. Os nad ydych yn ymwybodol ohoni, gadewch i ni esbonio.

Mae gwylwyr yn ddiweddar wedi bod yn gwylio Belle yn dioddef cam-drin domestig dan ddwylo ei gŵr ystrywgar a rheolaethol, Tom.

Mae Belle (a gaiff ei chwarae gan Eden Taylor-Draper) wedi bod yn dioddef y cam-drin hwn am fisoedd, a thrwy'r cyfnod hwn gwelwyd Tom (a gaiff ei chwarae gan James Chase) yn:

• Cam-drin Belle yn gorfforol, ar lafar ac yn emosiynol.
• Rheoli eu cyllid ac yn gwneud rhestr o'r arian y mae Belle yn ei wario.
• Peryglu cyfle Belle o gael swydd – felly mae'n ddibynnol arno yn ariannol.
• Cyflwyno gwybodaeth ffug i deulu a ffrindiau Belle.
• Torri Belle i ffwrdd o'i ffrindiau dros amser.
• Rhoi tracwyr / ysbïwedd ar liniadur a ffôn Belle ac yn ei gwylio drwy'r camera ci bach sydd ganddynt ar gyfer eu ci.
• Rhoi'r bai ar Belle am fater y mae wedi ei godi.

Mae'r rhain i gyd yn arwyddion a dangosyddion clir o gam-drin domestig ac ymddygiad rheolaethol - ac mae cynhyrchwyr y rhaglen wedi gweithio'n agos gyda'r elusen Refuge ar y llinell stori hon.

Os ydych chi'n dioddef cam-drin domestig, mae'n siwr y byddwch yn uniaethu â hyn ac wedi profi rhai o'r pethau hyn yn union fel Belle. Gallech gredu hyd yn oed mai cariad yw hyn - yn enwedig pan fydd, fel Tom, yn dweud pethau fel:

• Paid â gweithio, galla i ddarparu ar dy gyfer di.
• Dw i'n mynd mor grac achos fy mod i'n dy garu di gymaint.
• Alla i ddim byw hebddot ti – dw i ddim yn ymddiried yn fy hun os byddet yn gadael.

Er y gall ymddygiad fel hwn gael ei ramanteiddio, nid yw'n normal nac yn iach. Mae'n ystrywgar.

Os byddwch chi'n gweld eich hun yn gwylio ac yn uniaethu â phrofiadau Belle – neu rai ohonynt – byddem yn eich annog i siarad â rhywun.

Gwyddom pa mor anodd y gall fod, yn enwedig gan ei fod yn ymwneud â rhywun rydych yn ei garu, ynghlwm ag ef, neu sy'n codi ofn arnoch hyd yn oed - ond mae help ar gael a chlust i wrando arnoch chi.

Gallwch hefyd siarad â ni drwy ffonio 101, neu roi gwybod i ni drwy ein hadnodd defnyddiol ar-lein. Os ydych chi mewn perygl, ffoniwch 999.

Gallwch ddod o hyd i linellau cymorth a rhagor o wybodaeth am gam-drin domestig a'r cymorth sydd ar gael, yn ogystal â sut i wneud cais am wybodaeth o dan Gyfraith Clare, ar dudalen ein hymgyrch Gweld Fi.