Gwobrau #TîmHDC 2024: Dewch i gwrdd â'n henillwyr

Anhunanoldeb, ymroddiad, dewrder ac arloesedd – dim ond rhai o'r priodweddau a ddathlwyd neithiwr yw'r rhain pan gynhaliwyd Gwobrau #TîmHDC 2024.

Mae'r gwobrau blynyddol, a gynhaliwyd yn Neuadd y Brangwyn, Abertawe eleni yn rhoi sylw i weithredoedd a gwaith swyddogion, staff, gwirfoddolwyr a'n partneriaid sydd wedi dod i'r amlwg yn ystod y flwyddyn ddiwethaf.

Clywodd y rhai a oedd yn bresennol yn y digwyddiad, a oedd yn cynnwys anwyliaid y rhai a enwebwyd a'n noddwyr, straeon eithriadol ac ysbrydoledig am bobl sydd wedi rhagori yn eu maes, neu sydd wedi mynd ymhellach na'r disgwyl ar gyfer y cymunedau rydym yn eu gwasanaethu.

Yr enillwyr eleni a ddewiswyd gan y Prif Gwnstabl Jeremy Vaughan a Chomisiynydd yr Heddlu a Throseddu Emma Wools, yw:

• Gwobr Dewrder: Y Rhingyll Holly Price a'r Cwnstabl Jordan Rockey, a beryglodd eu diogelwch eu hunain i achub dyn a wnaeth arllwys petrol dros ei hun a rhoi ei hun ar dân.

 

• Gwobr Gymunedol: Y Ditectif Gwnstabl Steven Davies sydd wedi rhoi o'i amser i wella nifer y diffibrilwyr sydd ar gael a chodi dros £50,000 i gynnal y cyfarpar achub bywyd ar ôl iddo achub bywyd aelod o'r cyhoedd gan ddefnyddio diffibriliwr.

 

• Gwobr Cydraddoldeb, Amrywiaeth a Chynhwysiant: Y Rhingyll Alison Robinson, a sefydlodd grŵp cefnogi cymheiriaid ar gyfer colli babanod, gan gyfrannu'n uniongyrchol at Gynllun Cyflawni'r Prif Gwnstabl i flaenoriaethu iechyd a llesiant, gan ddangos arweinyddiaeth gefnogol, a blaenoriaethu cynwysoldeb.

 

• Gwobr y Filltir Ychwanegol i Wirfoddolwyr: Y Rhingyll Gwirfoddol Benjamin Johns, a ymunodd â'r Gwnstabliaeth Wirfoddol yn 2015 ac sydd wedi bod yn aelod allweddol o'r tîm, ac yn fentor agos atoch ac ysbrydoledig i eraill byth ers hynny. Yn 2023 yn unig, rhoddodd 1,107 o oriau o'i amser i gymunedau De Cymru.

 

• Gwobr Argraff: Cwnstabl Jonathan Abel, a gafodd ei ddisgrifio fel “unigolyn arloesol” yn ei ymdrechion i darfu ar grŵp o bobl ifanc a oedd yn achosi diflastod yn y gymuned leol, gan sicrhau chwe Gorchymyn Ymddygiad Troseddol a chan weithio gyda phartneriaid i sicrhau ymyriad pellach.

 

• Gwobr Ymchwiliad y Flwyddyn: Cyd-enillwyr – yr Uned Ymchwiliadau i Wrthdrawiadau Difrifol (SCIU) a'r Ditectif Gwnstabl Eleanor Dallas. Gwobrwywyd SCIU am ei gwaith diflino yn dod â gyrrwr a fethodd â stopio ar ôl taro beiciwr, gan achosi i'r dioddefwr golli ei goes, o flaen ei well. Hefyd, enwyd DC Dallas yn gyd-enillydd am ei gwaith yn sicrhau dedfryd o 30 mlynedd o garchar i droseddwr cam-drin plant a oedd wedi cam-drin nifer o ddioddefwyr am bron i hanner canrif.

 

• Gwobr Arweinyddiaeth: Y Ditectif Brif Arolygydd Andrew Bartholomew, a arweiniodd yr ymchwiliad cymhleth a phellgyrhaeddol i gyn gwnstabl yr heddlu Lewis Edwards, a wnaeth gam-drin cannoedd o blant ar-lein. Yn ogystal â sicrhau bod y treial yn cael ei ohirio er mwyn sicrhau y gallai'r nifer uchaf posibl o ddioddefwyr gael eu cydnabod yn y cyhuddiadau, mae'r tîm hefyd wedi estyn allan at lwyfannau amrywiol y cyfryngau cymdeithasol i'w herio i blismona eu cynnwys yn well.

 

• Gwobr Cyflawniad Oes Swyddogion yr Heddlu: Gwnaeth cyn gwnstabl yr heddlu, Paul Union, “heddwas stryd o'r iawn ryw” ymddeol ym mis Mehefin ar ôl 28 o flynyddoedd ar y rheng flaen yn gweithio gyda chymunedau Grangetown.

 

• Gwobr Cyflawniad Oes Staff yr Heddlu: Colin Probert, Arbenigwr Rhwydweithiau TGCh, sydd wedi bod yn allweddol wrth gyflawni sawl prosiect cymhleth sydd wedi gwella galluoedd cyfathrebu yn ein sefydliad ac i'r cymunedau rydym yn eu gwasanaethu.

 

• Gwobr Ymgyrch y Flwyddyn: Gwelodd Ymgyrch Wormit Grŵp Troseddau Cyfundrefnol yn cael eu gwneud yn gyfrifol am gludo gwerth £1.4m o eitemau gwaharddedig i mewn i garchardai'r DU drwy ddrôn, tarfu arnynt a'u dwyn gerbron y Llysoedd.

 

• Gwobr Datrys Problemau mewn Partneriaeth: Y Rhingyll Jacob Rollnick a Mandy Flood o Safonau Masnach, a arweiniodd eu timau priodol i ymchwilio i grŵp a oedd yn defnyddio sawl siop yng Nghaerdydd, Y Barri a Phen-y-bont ar Ogwr i werthu cynhyrchion tybaco anghyfreithlon a/neu sylweddau seicoweithredol a chwalu'r grŵp hwnnw. Gwnaeth y grŵp wyngalchu £1.8 miliwn – credir mai dyma un o'r achosion mwyaf o smyglo tybaco anghyfreithlon yng Nghymru.

 

Darllenwch ragor o fanylion am ein henillwyr a'r bobl eraill yn y rownd derfynol yma.