Gwirfoddolwyr Cefnogi’r Heddlu
Dinasyddion lleol yw Gwirfoddolwyr Cefnogi'r Heddlu sy'n rhoi o'u hamser rhydd i helpu Heddlu De Cymru i gadw ein cymunedau'n ddiogel.
Maent yn cyflawni rolau amrywiol ac maent yn rhan sefydledig o'n teulu plismona.
Maent yn darparu adnoddau ychwanegol i ategu ymdrechion pob dydd swyddogion a staff rheolaidd a chysylltiadau ychwanegol i'n cymunedau.
Nid oes ganddynt unrhyw bwerau plismona ond maent yn cael eu fetio cyn cwblhau tasgau ar ran Heddlu De Cymru.
Mae llawer o Wirfoddolwyr Cefnogi'r Heddlu yn meddu ar wybodaeth a sgiliau defnyddiol a gafwyd o'u profiadau o'r tu allan i'r byd plismona.
Mae rolau gwirfoddolwyr cefnogi'r heddlu yn helpu ac yn gwella'r gwaith arferol y mae swyddogion a staff yr heddlu yn ei wneud o ddydd i ddydd.
Mae cyfleoedd yn amrywio o un lleoliad i'r llall, gan ddibynnu ar anghenion lleol.
Fodd bynnag, mae rolau arferol yn cynnwys:
- Helpu timau plismona yn y gymdogaeth i feithrin cydberthnasau â'u cymunedau
- Gweithio ochr yn ochr â Swyddogion yn yr Economi Liw Nos
- Diweddaru gwefannau
- Cynnal arolygon cymunedol
- Dosbarthu taflenni a chylchlythyrau
- Gweinyddu cyffredinol
- Helpu gyda digwyddiadau lleol
- Helpu i ymdrin ag eiddo wedi'i ganfod, eiddo coll ac eiddo wedi'i ddwyn
- Helpu gyda Chynlluniau Gwarchod
- Helpu gyda Rhaglen Gwirfoddolwyr Ieuenctid yr Heddlu.
Gofynnwn i'n gwirfoddolwyr feddu ar rai sgiliau sylfaenol
- Dibynadwyedd
- Unplygrwydd
- Rhifedd sylfaenol
- Llythrennedd
- Sgiliau TG sylfaenol.
Dylai gwirfoddolwyr hefyd ddangos agwedd gadarnhaol a chyfeillgar a pharodrwydd i ddysgu.
Rydym yn chwilio am bobl 18 oed a throsodd o gefndiroedd gwahanol, sy'n meddu ar sgiliau a phrofiadau i'n cynorthwyo.
Mae gwirfoddolwyr yn dod ag amrywiaeth eang o brofiadau bywyd a sgiliau i'r timau y maent yn eu cefnogi ac yn ychwanegu gwerth at waith staff hyfforddedig. Mae gwirfoddolwyr yn aml yn meddu ar gyfoeth o wybodaeth ac arbenigedd a all fod o fudd i'r gymuned ehangach hefyd.
Gellir cael rhagor o wybodaeth drwy gysylltu â ni [email protected]
A yw gwirfoddolwyr yr un peth â chwnstabliaid gwirfoddol?
Nid yw gwirfoddolwyr yn rhan o'r Gwnstabliaeth Wirfoddol. Nid oes ganddynt bwerau plismona.
Pwy all wirfoddoli?
Er mwyn gwirfoddoli, rhaid i chi fod 18 oed neu drosodd ac wedi bod yn byw yn y DU am o leiaf dair blynedd.
Rhaid i chi ddatgelu unrhyw euogfarnau blaenorol a chydsynio i Heddlu De Cymru gynnal archwiliad Fetio'r Heddlu Cenedlaethol (noder na fydd cofnod troseddol o reidrwydd yn eich atal rhag cael eich ystyried am rôl wirfoddol. Bydd methu â datgelu cofnod troseddol, sy'n dod i'r amlwg yn ddiweddarach, yn arwain at gael eich diswyddo o rôl wirfoddol ar unwaith).
Bydd ymgeiswyr yn ddarostyngedig i'r un meini prawf â holl aelodau'r heddlu. Efallai y bydd angen cynnal gwiriadau eraill yn dibynnu ar y rôl wirfoddol sy'n cael ei chyflawni.
Ni chaiff ymgeiswyr eu derbyn fel gwirfoddolwyr os bydd gwrthdaro buddiannau yn eu bywyd proffesiynol neu rôl wirfoddol arall.
Felly, fel rhan o'u cais, mae'n ofynnol iddynt ddatgelu natur eu cyflogaeth neu fanylion unrhyw waith gwirfoddol arall a wneir.
Sut mae'r gwirfoddolwr yn cael budd?
Mae gwirfoddoli i Heddlu De Cymru yn rhoi cyfle i'r gwirfoddolwr weithio ochr yn ochr â swyddogion a staff yr heddlu, gan feithrin sgiliau gwerthfawr ac ennill profiad mewn sefydliad proffesiynol a chyhoeddus. Mae'n cynnig y cyfle i gwrdd â phobl newydd a gweithio fel rhan o dîm, ymgysylltu a rhyngweithio â phobl o gymunedau a chefndiroedd gwahanol a gwneud cyfraniad cadarnhaol at y gymuned leol.
Fel gwirfoddolwr, byddwn yn cynnig y canlynol i chi...
- Cymorth
- Os cewch eich cymeradwyo fel gwirfoddolwr, byddwch yn cael cyngor, arweiniad a chymorth i gyflawni eich gweithgareddau.
- Hyfforddiant
- Ni fydd disgwyl i chi ymgymryd â thasgau nad ydych yn gyfarwydd â nhw.
- Rhoddir hyfforddiant priodol, gan ddechrau gyda chyfnod sefydlu yn y sefydliad.
- Treuliau
- Gall gwirfoddolwyr hawlio treuliau teithio penodol a threuliau eraill.
- Cytunir ar y rhain â chi os cewch eich cymeradwyo fel gwirfoddolwr cefnogi'r heddlu.
Rydym yn hynod ymrwymedig i gydraddoldeb ac amrywiaeth yn y sefydliad ac yn y gwasanaeth rydym yn ei ddarparu. Ein nod yw hyrwyddo a chyflawni gweithlu cwbl gynhwysol i adlewyrchu'r cymunedau rydym yn eu gwasanaethu.
Mae Heddlu De Cymru yn benodol yn croesawu ceisiadau gan grwpiau wedi'u tangynrychioli.