Posteri am bobl ar goll a chyhoeddusrwydd
Mae’r rhan fwyaf o bobl sydd ar goll yn cael eu canfod neu’n dychwelyd o fewn yr ychydig ddyddiau cyntaf. Os na fydd rhywun yn dod yn ôl yn gyflym, bryd hynny efallai y byddwch am roi cyhoeddusrwydd i'r achos.
Posteri a’r cyfryngau cymdeithasol
Gallwch osod posteri yn yr ardal leol neu lle’r ydych chi’n meddwl y gallai’r person fod wedi mynd ar goll.
- Gall yr heddlu weithio gyda’r elusen Missing People i’ch helpu i greu posteri swyddogol i bobl sydd ar goll. Gallwch chi eu lawrlwytho a’u hargraffu. Gall Missing People dderbyn galwadau gan bobl a allai fod wedi gweld rhywun. Mae ganddyn nhw linell ffôn benodol ar gyfer pobl ar goll - 116 000.
- Gallwch hefyd ddefnyddio’r cyfryngau cymdeithasol fel Facebook a X.com. Efallai y bydd yr heddlu’n rhoi cyhoeddusrwydd i’ch achos ar eu sianeli cyfryngau cymdeithasol nhw hefyd.
Peidiwch â defnyddio eich rhif ffôn eich hun
Peidiwch â rhoi eich rhif ffôn eich hun ar bosteri nac ar y cyfryngau cymdeithasol oherwydd efallai y cewch alwadau yn ceisio eich twyllo. Holwch yr heddlu am rif i’w ddefnyddio neu cyd-weithiwch â Missing People a defnyddio eu rhif nhw - 116 000.
Cofiwch, unwaith y bydd stori’n gyhoeddus, gall fod yn amhosibl dileu cyfeiriadau ati ar-lein yn y dyfodol. Gallai hyn effeithio ar y person ar ôl iddo ddychwelyd, os yw pobl eraill yn gwybod ei fod wedi mynd ar goll. Efallai y byddwch yn dewis defnyddio enw cyntaf y person coll yn unig.
Cyfryngau lleol
Gallech gysylltu â’r papur newydd, yr orsaf radio neu’r orsaf deledu leol i weld a fyddent yn cyhoeddi neu’n darlledu stori am eich achos.
Cofiwch efallai na fyddant yn adrodd y stori yn y ffordd y dymunwch, neu efallai na fyddant yn cyhoeddi’r stori o gwbl. Mae’n bosib y byddan nhw’n cysylltu â phobl eraill i gael gwybodaeth am y person coll.
Os ydych chi’n anhapus â rhywbeth sydd wedi cael ei gyhoeddi neu ag ymddygiad newyddiadurwyr, siaradwch â nhw a gofyn iddyn nhw gywiro neu newid y stori.
Er enghraifft, os yw newyddiadurwyr yn cysylltu â ffrindiau a theulu sydd ddim eisiau gwneud sylw, y peth cyntaf i’w wneud yw gofyn iddynt roi’r gorau iddi.
Os nad ydych chi’n fodlon â’u hymateb, gallwch wneud cwyn i’r Sefydliad Annibynnol Safonau’r Wasg(IPSO) neu'r Swyddfa Gyfathrebiadau (OFCOM) ar gyfer y teledu a’r radio.
Cynnal diddordeb y cyfryngau yn eich achos
Os oes rhywun ar goll am gyfnod hir, dyma rai syniadau ar gyfer cynnal diddordeb yn eich achos:
- Cysylltwch â gwleidyddion neu bobl ddylanwadol eraill yn eich cymuned fel y gallant helpu i godi ymwybyddiaeth o’ch achos
- Creu gwefan gyda gwybodaeth am y person a’i ddiflaniad. Mae hyn yn golygu na fydd yn rhaid i chi ddechrau o’r dechrau bob tro y byddwch yn siarad â’r cyfryngau Tynnwch sylw at yr achos ar ddyddiad ei ddiflaniad y flwyddyn wedyn ac ar ben-blwydd y person (er mae’n siŵr y byddai’r diwrnodau hynny yn ddyddiau anodd i chi)
- Siaradwch â ni am gomisiynu arbenigwr i greu darlun o sut y gallai’r person edrych erbyn hyn
Gweithio gyda’r heddlu
Gwnewch yn siŵr eich bod yn cydlynu unrhyw gyhoeddusrwydd gyda ni fel ein bod yn gwybod beth rydych chi’n ei wneud.
Mae gennym staff proffesiynol yn y cyfryngau a all helpu i gydlynu cyhoeddusrwydd a rhoi cyngor ymarferol i chi.
Gallwn hefyd roi cyhoeddusrwydd i’ch achos ar wefan yr heddlu neu ar y cyfryngau cymdeithasol. Byddwn yn sensitif i’ch dymuniadau a dim ond cynnwys gwybodaeth rydych chi’n fodlon ei rhannu.
Weithiau, efallai y byddwn yn awgrymu gweithio gyda ni i wneud apêl ar y cyfryngau/teledu. Os penderfynwch chi gymryd rhan, byddwn yn trafod y camau nesaf gyda chi.
O bryd i’w gilydd, efallai y byddwn yn cynghori yn erbyn unrhyw gyhoeddusrwydd.