Cwnstabliaeth Wirfoddol yn mynd i'r afael ag adroddiadau am ymddygiad gwrthgymdeithasol a chyffuriau ym mis Awst

Treuliodd Cwnstabliaid Gwirfoddol o Abertawe, Castell-nedd a Phort Talbot dros 800 awr o'u hamser yn gwirfoddoli ym mis Awst er mwyn mynd i'r afael â materion lleol.

Ddydd Sadwrn 29 Awst, daethant â’u gwaith yn ystod mis Awst i ben gydag ymgyrch amlwg iawn ledled Abertawe i helpu i fynd i'r afael ag ymddygiad gwrthgymdeithasol a chyffuriau.

Arweiniodd yr ymgyrch, a oedd yn canolbwyntio ar ardaloedd problemus fel Marina Abertawe, at arestio chwe unigolyn a stopio a chwilio pedwar person. Gwirfoddolodd y cwnstabliaid gwirfoddol gyfanswm o 85 awr.

O blith y digwyddiadau, gwnaethant ymateb i wyth galwad frys o bwysigrwydd uchel, wyth adroddiad yn ymwneud â thrais, a thri digwyddiad oedd yn gysylltiedig ag ymddygiad gwrthgymdeithasol.

Roedd yr ymgyrch yn nodi diwedd gweithgarwch mis Awst i Gwnstabliaeth Wirfoddol Abertawe, Castell-nedd a Phort Talbot, ar ôl gwirfoddoli cyfanswm o 804 awr ac ymateb i 172 o ddigwyddiadau, gan gynnwys y canlynol:

• Ymateb i 93 o alwadau brys o bwysigrwydd uchel
• Ymateb i 11% o'r holl alwadau y neilltuwyd swyddogion ar eu cyfer a 40% o'r holl alwadau am ymddygiad gwrthgymdeithasol ym Mhort Talbot
• Y cwnstabliaid gwirfoddol oedd y cyntaf i gyrraedd y lleoliad yn dilyn achos o ddwyn o siop ac adroddiadau am ffatri ganabis
• Stopio a chwilio 20 bobl, yr oedd canlyniad positif i 5 ohonynt
• Cyflwyno 20 o atgyfeiriadau ymddygiad gwrthgymdeithasol

Dywedodd yr Arolygydd Gwirfoddol Keiron Pike:

"Nod yr ymgyrch hon oedd darparu presenoldeb gweladwy i dawelu meddyliau yn ein cymunedau, ymgysylltu ag aelodau o'r cyhoedd a mynd i'r afael â'r materion sydd bwysicaf i bobl leol.

"Mae'r swyddogion hyn yn rhoi o’u hamser rhydd, ac yn cydbwyso hynny ag ymrwymiadau gwaith, teuluol a phersonol er mwyn gwasanaethu'r cymunedau maen nhw’n byw ac yn gweithio ynddynt. Mae eu hymroddiad, eu proffesiynoldeb a'u hymrwymiad i wasanaethu’r cyhoedd yn parhau i wneud gwahaniaeth gwirioneddol ledled ardal de Cymru.

"Rwy'n annog y cyhoedd i ddal ati i riportio pryderon wrthym ni fel y gallwn barhau i dargedu ein hymgyrchoedd a chadw'r cyhoedd yn ddiogel"

Mae Cwnstabliaid Gwirfoddol yn swyddogion heddlu gwirfoddol sy'n gweithio ochr yn ochr â swyddogion llawn amser i ddiogelu, gwasanaethu a rhoi sicrwydd i’n cymunedau. Gallwch ddysgu mwy am y rôl yma - Rôl Cwnstabl Gwirfoddol yr Heddlu (Swyddog Heddlu Gwirfoddol) | Heddlu De Cymru