Carchar i ddyn o Abertawe ddeuddydd ar ôl iddo gael ei arestio am ddwyn eitemau o gar

Arweiniodd gwaith cyflym gan swyddogion Heddlu De Cymru at arestio dyn a'i ddedfrydu dim ond deuddydd ar ôl iddo gael ei ddal yn torri i mewn i gerbyd a dwyn eitemau o'r car.

Torrodd Darren Williams, 54 oed o Uplands, i mewn i'r cerbyd ar lôn oddi ar Walter Road ar 23 Mawrth. Cafodd Williams ei ddal ar deledu cylch cyfyng yn torri ffenestr flaen y cerbyd ar ochr y teithiwr, cyn iddo ddychwelyd yn ddigywilydd i leoliad y drosedd awr yn ddiweddarach er mwyn ceisio mynd i mewn i'r cerbyd eto.

Cafodd Williams ei arestio yn fuan wedyn, ar ôl i swyddogion nodi ei fod yn cyfateb i'r disgrifiad o'r dyn a welwyd yn y lluniau teledu cylch cyfyng. Gwelwyd bod gan Williams yr eitemau a gafodd eu cymryd o'r car yn ei feddiant.

Plediodd Williams yn euog i ddwyn o gerbyd modur ac achosi difrod troseddol i eiddo. Mae wedi cael ei ddedfrydu i 12 wythnos yn y carchar.

Dywedodd Cwnstabl yr Heddlu Luke Morgan:

“Mae lladron fel Darren Williams yn gwneud i bobl dda sy'n parchu'r gyfraith yma yn Abertawe deimlo'n ofnus y gallai eu cerbyd gael ei dargedu ar unrhyw adeg.

“Mae gennym ddull gweithredu dim goddefgarwch mewn perthynas â dwyn o gerbydau modur, ac roeddem yn falch o weld y troseddwr haerllug hwn yn cael ei ddwyn i gyfrif mor gyflym."