Wedi sylwi. Wedi riportio. Wedi’i sortio: Heddlu De Cymru yn lansio ymgyrch i fynd i'r afael â beiciau sy'n cael eu gyrru'n anghyfreithlon

Mae Heddlu De Cymru wedi lansio ymgyrch gyhoeddus gyda'r nod o fynd i'r afael â'r sawl sy'n defnyddio beiciau – gan gynnwys beiciau trydan a beiciau modur trydan – mewn ffordd anghyfreithlon ledled ardal yr heddlu.

Mae'r heddlu wedi gwrando ar bryderon y gymuned, ac mae'n deall y gall camddefnyddio'r cerbydau hyn gael effaith sylweddol ar gymunedau lleol.

Mae'r neges i'r cyhoedd yn glir: Wedi sylwi. Wedi riportio. Wedi’i sortio.

Dywedwch wrth yr heddlu beth rydych chi wedi ei weld a’i brofi, ynghyd â ble a phryd mae'r beiciau hyn yn cael eu gyrru'n anghyfreithlon. Ydych chi'n gwybod ble maen nhw'n cael eu storio? Allwch chi rannu unrhyw wybodaeth am y gyrwyr neu'r beiciau, er enghraifft a oes ganddynt nodweddion unigryw?

Ar hyn o bryd, mae data* yn dangos bod y pum ardal sydd wedi riportio'r nifer mwyaf o broblemau fel a ganlyn:

• Llandaf
• Caerau (Caerdydd)
• Yr Eglwys Newydd
• Tremorfa
• Trelái

Dywedodd y Prif Gwnstabl Cynorthwyol Tom Williams, sy'n arwain yr ymgyrch hon:

"Rwyf eisiau i'r cyhoedd wybod ein bod ni'n cymryd y defnydd anghyfreithlon o feiciau, ac unrhyw ymddygiad gwrthgymdeithasol neu weithgarwch troseddol cyfundrefnol sy'n gysylltiedig, o ddifrif.

"Mae tri cham i'r ymgyrch hon, sef rhoi gwybod i'r cyhoedd beth mae defnyddio beiciau'n anghyfreithlon yn ei olygu, ei gwneud hi'n hawdd iddyn nhw riportio'r mater i ni, a chymryd camau ar ôl derbyn gwybodaeth. Os oes gennych chi luniau camera cerbyd neu gloch drws, neu unrhyw luniau neu wybodaeth arall, cysylltwch â ni.

"Fel bob amser, rydyn ni’n dibynnu ar gefnogaeth y cymunedau rydyn ni'n eu gwasanaethu i sicrhau bod y gwaith hwn yn llwyddiannus. Allwn ni ddim gwneud hyn ar ein pennau ein hunain. Rwy'n apelio ar unrhyw un sydd â gwybodaeth am unigolion sy'n defnyddio'r beiciau anghyfreithlon hyn, gan gynnwys ble maen nhw'n eu gyrru a’u storio, i ddweud wrthyn ni drwy ein porth ar-lein.

"Rydyn ni'n parhau i fuddsoddi yn y dechnoleg a'r galluoedd sydd eu hangen i adnabod a mynd ar drywydd y rhai hynny sy'n gyfrifol. Mae hyn yn cynnwys ehangu ein tîm dronau ac ystyried y posibilrwydd o brynu rhagor o offer i gryfhau'r dystiolaeth y gallwn ni ei chasglu a gwella’r cyfleoedd i ddwyn troseddwyr gerbron y llysoedd.

Mae fy neges i'r sawl sy'n gyrru beiciau’n anghyfreithlon yn un syml: Byddwn yn eich dal chi."

Gall y cyhoedd roi gwybod am feiciau sy'n cael eu gyrru'n anghyfreithlon a lanlwytho lluniau neu fideos yma.