Sut rydym yn mynd i'r afael â beiciau sy'n cael eu defnyddio'n anghyfreithlon
Rydym yn gwybod bod llawer o bobl yn ne Cymru yn pryderu am feiciau – gan gynnwys beiciau modur trydanol a beiciau oddi ar y ffordd – sy'n cael eu gyrru'n anghyfreithlon.
Fel rhan o Ymgyrch Grebe, rydym yn cynyddu ein hymdrechion i fynd i'r afael â'r problemau hyn a sicrhau bod ein strydoedd a'n ffyrdd yn ddiogelach i bawb.
Riportio beiciau anghyfreithlon
Mae arnom angen gwybodaeth am feiciau sy'n cael eu gyrru mewn modd anghyfreithlon, am feiciau nad ydynt yn gyfreithlon ar gyfer y ffordd, ac am feiciau sy'n gysylltiedig â throseddau fel gwerthu cyffuriau. Mae reidio beiciau yn anghyfreithlon yn rhoi'r cyhoedd a'r beicwyr eu hunain mewn perygl, gellir eu defnyddio i gyflawni trosedd, gall achosi difrod troseddol, a gellir tybio bod hyn yn ymddygiad gwrthgymdeithasol.
Pa fath o wybodaeth sy'n ddefnyddiol?
Helpwch i gadw'ch cymuned yn ddiogel a dywedwch wrthym beth rydych chi'n ei wybod am feiciau sy'n cael eu defnyddio'n anghyfreithlon:
- Yr union leoliad, dyddiad ac amser y gwelwyd y beic/beiciau
- Unrhyw beth nodedig – lliw, gwneuthuriad, a oedd plât rhif gan y beic
- Ble maen nhw'n cael eu storio?
- Pwy sy'n eu gyrru'n anghyfreithlon, a beth roedden nhw'n ei wisgo?
- Pwy sy'n achosi difrod troseddol?
- Pwy sy'n rhoi'r cyhoedd a'u hunain mewn perygl?
Oes gennych chi wybodaeth am weithgarwch beiciau anghyfreithlon?
Pa feiciau trydan sy'n gyfreithlon?
Dim ond beiciau sy'n gyson â'r diffiniad o feic pedal a gynorthwyir yn drydanol (EAPC) y gellir eu reidio a'u trin yr un fath â beic pedal confensiynol, ar yr amod bod y defnyddiwr yn 14 oed neu hŷn. Mae defnydd confensiynol yn cynnwys reidio ar y ffyrdd a reidio ar lwybrau beicio.
Os nad yw eich beic yn EAPC, ystyrir ei fod yn feic modur neu'n foped.
Mae beiciau modur a mopeds yn gofyn am y canlynol:
- Trwydded Hyfforddiant Sylfaenol Gorfodol: Cwblhewch Hyfforddiant Sylfaenol Gorfodol oni bai eich bod eisoes yn meddu ar drwydded gyflawn i feic modur. Mae hyn yn sicrhau bod gennych y sgiliau a'r wybodaeth i reidio'n ddiogel ar ffyrdd cyhoeddus. Rhaid cael trwydded yrru ddilys er mwyn gyrru'r beic.
- Rhaid i chi wisgo helmed beic modur sy'n bodloni safonau diogelwch Prydeinig.
- Cofrestru gyda'r DVLA: Rhaid i'ch beic fod wedi'i gofrestru gyda'r DVLA. Bydd angen prawf o'i brynu, manylebau'r beic, a thalu'r ffi gofrestru. Mae'r cam hwn yn hanfodol i wneud eich beic modur/moped yn gyfreithlon ar ffyrdd y DU.
- Plât rhif: Ar ôl cofrestru, mae plât rhif y Deyrnas Unedig yn orfodol.
- Yswiriant: Rhaid i bob cerbyd ffordd fod ag yswiriant. Mae cwmnïau sy'n cynnig yswiriant ar gyfer beiciau o'r math wedi'u rhestru ar-lein.
- Treth Cerbydau: Er bod beiciau trydanol yn gyffredinol wedi'u heithrio rhag talu treth cerbydau, mae angen cofrestru i gydymffurfio â chyfraith y Deyrnas Unedig.
- MOT: Ar ôl tair blynedd, bydd angen MOT, ar eich beic, yn union fel unrhyw gerbyd arall ar y ffordd fawr. Mae hyn yn sicrhau bod eich beic yn parhau i fod yn addas i'r ffordd fawr ac yn ddiogel i bob beiciwr.
Beiciau 'Twist and Go'
Os oes gennych feic a gynorthwyir yn drydanol heb ddefnyddio'r pedalau, a elwir fel arfer yn 'Twist and Go', dylech sicrhau bod eich beic yn bodloni gofynion Rheoliadau EAPC ac wedi cael "cymeradwyaeth math" wrth gael ei weithgynhyrchu. Os nad ydyw, ac nid ydych wedi ceisio Cymeradwyaeth Cerbyd Sengl Beic Modur (MSVA), ni fydd y beic yng nghategori EAPC ac fe fydd yn anghyfreithlon ei ddefnyddio ar y ffordd fawr.
