“Nid wyf am adael i'r hyn a ddigwyddodd i mi fel ‘dioddefwr’ y noson honno reoli gweddill fy mywyd. Rwy'n oroeswr. Ac rwyf am greu fy llwybr unwaith eto”
Cynnwys y prif erthygl
“Nid wyf am adael i'r hyn a ddigwyddodd i mi fel ‘dioddefwr’ y noson honno reoli gweddill fy mywyd. Rwy'n oroeswr. Ac rwyf am greu fy llwybr unwaith eto.”
Dyma eiriau dewr menyw a ddioddefodd ymosodiad rhywiol dan fygythiad cyllell gan berson dieithr yn ei chartref yng Nghaerdydd.
Mae ei hymosodwr, Thamer Alrabie, wedi cael ei ddedfrydu i 9 mlynedd a 2 fis o garchar.
Aeth y dyn 36 oed o Lecwydd i mewn i gartref y dioddefwr yn hwyr y nos ar 12 Ionawr 2025.
Yn ffodus, cafodd tad y dioddefwr ei ddeffro gan y sŵn ac ymladdodd ag Alrabie.
Cafodd ei adnabod fel yr unigolyn dan amheuaeth yn dilyn ymateb cyflym y swyddogion ac fe'i arestiwyd o fewn 24 awr.
Cynhaliwyd ymchwiliad manwl wedi hynny, a phlediodd Alrabie yn euog i achos o dresmasu er mwyn cyflawni trosedd rywiol, ymosodiad rhywiol, ymosodiad drwy daro a bygwth person ag eitem lafnog yn sgil cryfder y dystiolaeth.
Cafodd ei ddedfrydu yn Llys y Goron Caerdydd ar 21 Tachwedd.
Dywedodd y Ditectif Gwnstabl Luke Rimes, o Heddlu De Cymru:
“Mae ymosodiadau gan ddieithryn o'r fath yn anarferol iawn yn Ne Cymru ond, roedd Thamer Alrabie yn unigolyn peryglus dros ben.
“Mae gan bawb yr hawl i deimlo'n ddiogel yn eu cartrefi eu hunain a'r digwyddiad erchyll hwn yw hunllef waethaf pob menyw. Gallai'r noson fod wedi bod yn llawer gwaeth pe na bai ei thad wedi ymyrryd yn ddewr.
“Mae'r dioddefwr wedi dangos dewrder a chryfder eithriadol i barhau â'r mater hwn.
“Gobeithio y bydd y canlyniad yn y llys yn rhoi rhywfaint o heddwch iddi ac yn ei galluogi i ddechrau teimlo'n ddiogel eto.”
Roedd hi'n Ddiwrnod y Rhuban Gwyn ar 25 Tachwedd a oedd yn dynodi dechrau cyfnod o weithredu dros 16 diwrnod: cyfnod allweddol i godi ymwybyddiaeth o drais yn erbyn menywod a merched.
Mae menywod a merched yn dioddef achosion o drais a cham-drin i raddau anghymesur, ac yn dioddef mwy dan ddwylo partner, cyn-bartner neu aelod o'r teulu, a dieithryn weithiau.
Rydym am annog dynion i ddwyn eu hunain i gyfrif i fenywod, ac i'w gilydd.