Codi ymwybyddiaeth o gam-fanteisio ar bobl ifanc: “Dim yn Ein Dinas Ni. Dim i’n Plant Ni”

Mae ymgyrch newydd bwerus wedi’i lansio gyda'r nod o godi ymwybyddiaeth am gam-fanteisio ar bobl ifanc ledled y ddinas.

Mae “Camfanteisio: Dim yn Ein Dinas Ni. Dim i’n Plant Ni” yn ceisio taflu goleuni ar natur gudd a chymhleth cam-fanteisio sy'n effeithio ar bobl ifanc, ac i rymuso cymunedau i sylwi ar yr arwyddion a gweithredu.

Gall cam-fanteisio gymryd sawl ffurf - troseddol, rhywiol, caethwasiaeth fodern, a rheolaeth orfodol - a gall effeithio ar unrhyw berson ifanc, ni waeth beth fo'u cefndir.   Mae plant a phobl ifanc yn wynebu risg uwch o gam-fanteisio am amrywiaeth o resymau ac mae nodi dangosyddion allweddol yn gynnar yn hanfodol ar gyfer cymorth ac ymyrraeth effeithiol. 

Mae arwyddion y gallai person ifanc fod yn destun cam-fanteisio yn cynnwys:

• Newidiadau yn eu hymddygiad 
• Derbyn anrhegion anesboniadwy 
• Perthnasoedd cyfrinachol 
• Defnydd ar-lein
• Newidiadau yn eu hymddangosiad 
• Newidiadau yn eu ffrindiau 
• Anafiadau
• Yn absennol ddydd neu nos 

Yn ganolog i'r ymgyrch mae'r neges bod diogelu yn gyfrifoldeb i bawb. Trwy weithio gyda'n gilydd - ar draws addysg, iechyd, gofal cymdeithasol, a gorfodi'r gyfraith - nod Caerdydd yw adeiladu amgylchedd mwy diogel lle mae cam-fanteisio yn cael ei nodi’n gynnar a dioddefwyr yn cael eu cefnogi gydag urddas a pharch.

Mae'r ymgyrch hon yn tynnu ar Strategaeth Mynd i'r afael â Chamfanteisio Bwrdd Diogelu Rhanbarthol Caerdydd a’r Fro sy'n hyrwyddo dull amlasiantaethol tuag at atal, amddiffyn a chynnig cymorth i ddioddefwyr.

Dywedodd y Ditectif Arolygydd Geraint Higgins,:

"Drwy lansio'r ymgyrch Atal Camfanteisio, ein nod yw mynd i'r afael â dau beth: addysgu'r cyhoedd am gam-fanteisio ar blant ac anfon neges i droseddwyr yng Nghaerdydd ein bod yn gweithio'n weithredol gyda'n cymunedau, ein partneriaid a'n busnesau i adnabod troseddwyr a diogelu dioddefwyr.

"Byddwn i’n annog unrhyw un sy'n sylwi ar rywbeth nad yw'n edrych yn iawn i'w adrodd i ni neu, os ydyn nhw'n fwy cyfforddus, i Crimestoppers yn ddienw.

"Gallai eich gwybodaeth fod yn hollbwysig. Gall ein helpu i amddiffyn plentyn agored i niwed rhag niwed pellach neu gefnogi ein hymchwiliadau i gamfanteisio. Gyda'n gilydd, gallwn sicrhau bod Caerdydd yn parhau i fod yn lle diogel i bobl ifanc, a’i gwneud yn lle gelyniaethus i bobl sy'n ceisio camfanteisio ar blant."

Dywedodd y Cynghorydd Peter Bradbury, yr Aelod Cabinet dros Drechu Tlodi a Chefnogi Pobl Ifanc:

"Nid oes lle i gam-fanteisio yng Nghaerdydd - nid yn ein dinas ni, ac yn sicr nid i'n plant ni. Mae'r ymgyrch hon yn alwad i weithredu i bawb yn ein cymuned i fod yn wyliadwrus, i siarad, ac i sefyll gyda'i gilydd yn erbyn y rhai sy'n ceisio niweidio pobl ifanc.

"Efallai na fydd plant a phobl ifanc sy'n destun camfanteisio bob amser yn edrych nac yn ymddwyn yn agored i niwed. Os nad yw rhywbeth yn teimlo'n iawn, efallai nad ydyw.

"Trwy adnabod yr arwyddion a rhannu pryderon - hyd yn oed manylion bach, gallwn amddiffyn ein plant ac anfon neges glir: Ni fydd Caerdydd yn goddef camfanteisio ar unrhyw ffurf.”

Gall unrhyw un sy'n pryderu am berson ifanc sy'n destun camfanteisio adrodd yn ddienw wrth Crimestoppers.. Ewch i crimestoppers-uk.org neu ffoniwch ni ar 0800 555 111

Os yw rhywun mewn perygl uniongyrchol ac angen help ar frys,  ffoniwch 999.

Cymorth pellach

Mae adnoddau defnyddiol i rieni, teuluoedd, neu unrhyw un sy'n pryderu am berson ifanc y mae camfanteisio’n effeithio arnynt ar gael yma:  Camfanteisio - Bwrdd Diogelu Caerdydd a'r Fro

Camfanteisio Troseddol ar Blant | Cam-drin plant | Heddlu De Cymru