Ein hymateb i gyhoeddi Rhan 2 o'r adroddiad ar Ymchwiliad Angiolini

Roedd Heddlu De Cymru ymhlith yr wyth heddlu a gafodd eu gwahodd i gymryd rhan yn Rhan 2 o Ymchwiliad Angiolini. Mae'r adroddiad heddiw yn ystyried a yw'r mesurau sydd eisoes yn bodoli yn atal troseddau â chymhelliant rhywiol yn erbyn menywod mewn mannau cyhoeddus.

Dywedodd y Prif Gwnstabl Cynorthwyol Tom Williams:

“Mae'n braf gweld bod nifer o'r mentrau yn Ne Cymru wedi cael eu cydnabod am fod yn effeithiol wrth fynd i'r afael â'r mater hollbwysig hwn. Mae gan bob menyw a merch yr hawl i deimlo'n ddiogel, ble bynnag y maent, ac ni ddylent ddioddef trais, achosion o aflonyddu na theimlo dan fygythiad.
“Mae mynd i'r afael â thrais a chamdriniaeth yn erbyn menywod a merched wedi bod yn flaenoriaeth i Heddlu De Cymru ers tro, ac rydym yn cydnabod bod mwy o bryder nag erioed ynghylch diogelwch personol a thrais.
“Fel heddlu, mae gennym hanes ardderchog o weithio mewn partneriaeth. Rydym yn targedu adnoddau er mwyn sicrhau llwybrau clir i ddiogelwch ar gyfer dioddefwyr, cefnogi a grymuso goroeswyr a buddsoddi mewn ymyriadau seiliedig ar dystiolaeth sy'n mynd i'r afael ag achosion sylfaenol, gan ymdrin â'r agweddau a'r ymddygiadau niweidiol sy'n arwain at drais a chamdriniaeth.
“Yn ogystal â phatrolau amlwg a gan swyddogion mewn dillad plaen, rydym yn cymryd rhan mewn amrywiaeth eang o fentrau i fynd i'r afael â thrais a chamdriniaeth gan gynnwys StreetSafe, Bws Diogelwch Caerdydd a Man Cymorth Abertawe. Mae'r adroddiad yn tynnu sylw at ostyngiad o 30% yn nifer y troseddau rhywiol mewn safleoedd trwyddedig yn Ne Cymru sydd wedi cofrestru â'r Fenter Trwyddedu Diogelwch a Bregusrwydd (SAVI) i hyrwyddo safleoedd trwyddedig sy'n fwy diogel i staff a chwsmeriaid.
“Yn ddiweddar, cefnogodd Heddlu De Cymru lansiad ymgyrch Ein Nos Ni gan Athletau Cymru er mwyn gwneud rhedeg yn fwy diogel i fenywod yn ystod y gaeaf ac rydym ar fin dechrau hyfforddiant i fabwysiadu Prosiect Vigilant, sef ymgyrch gan yr heddlu i dargedu ymddygiadau rheibus gan ddynion sy'n targedu menywod yn ystod yr economi liw nos a fydd yn gwella ymgyrchoedd presennol sydd eisoes ar waith yng nghanol ein dinasoedd. Mae ein hymgyrch ‘Gweld Fi’ yn tynnu sylw at brofiadau bywyd menywod a merched ledled De Cymru er mwyn codi ymwybyddiaeth ac annog dioddefwyr i adnabod yr arwyddion a rhoi gwybod i'r heddlu.
“Rydym yn croesawu'r argymhellion yn adroddiad heddiw ac yn ymrwymedig i weithio'n agos gyda phartneriaid fel awdurdodau lleol, prifysgolion, busnesau a sefydliadau eraill er mwyn parhau i wneud De Cymru'n lle diogel i fenywod a merched a sicrhau bod pobl yn teimlo'n ddiogel wrth fyw eu bywydau pob dydd.”

Mentrau diogelwch y ddinasoedd

Ein cenhadaeth, ein gweledigaeth a'n gwerthoedd