Pedwar unigolyn arall wedi'u harestio yn dilyn achos o saethu yn Nhonysguboriau

Mae Heddlu De Cymru yn parhau i ymchwilio i lofruddiaeth Joanne Penney yn dilyn achos o saethu yn Nhonysguboriau nos Sul.

Cafodd yr heddlu eu galw i gyfeiriad yn Llys Illtyd am 6.10pm nos Sul, 9 Mawrth, lle cafodd Joanne ei chanfod wedi'i hanafu'n ddifrifol ar ôl iddi gael ei saethu yn y frest.

Er gwaethaf ymdrechion gorau'r gwasanaethau brys, bu farw yn y fan a'r lle. Rydym yn cydymdeimlo â theulu a ffrindiau Joanne ar yr adeg hon, a byddwn yn gwneud popeth o fewn ein gallu i'w cefnogi.

Mae dyn lleol, 42 oed, a gafodd ei arestio nos Sul, 9 Mawrth, yn y ddalfa o hyd.

Neithiwr, nos Fawrth 11 Mawrth, cafodd pedwar unigolyn arall eu harestio yn ardal Heddlu Swydd Gaerlŷr mewn cysylltiad â'r digwyddiad – menyw 21 oed o Oadby, Swydd Gaerlŷr; dyn 27 oed o Oadby, Swydd Gaerlŷr; dyn 68 oed o Braunstone Town, Swydd Gaerlŷr a menyw 39 oed o Gaerlŷr. Maent yn y ddalfa ar hyn o bryd a byddant yn cael eu holi.

Mae'r dyn 42 oed o Donysguboriau a gafodd ei arestio yn nalfa'r heddlu o hyd.

Mae safleoedd troseddau yn parhau i fod ar waith wrth i waith fynd rhagddo i gasglu tystiolaeth yn dilyn y digwyddiad ac mae ymholiadau i'r amgylchiadau yn parhau.

Dywedodd y Ditectif Brif Uwch-arolygydd Ceri Hughes:

“Er bod yr arestiadau hyn yn ddatblygiad sylweddol, mae'r ymchwiliad i farwolaeth Joanne yn parhau ac mae gennym dîm o dditectifs profiadol a staff arbenigol yn gweithio'n galed i gadarnhau amgylchiadau'r digwyddiad ofnadwy hwn.”

O'r ymchwiliadau a gwblhawyd gennym hyd yma, gwyddom fod dau gerbyd – Nissan Note lliw beige anarferol (BK61 ZDC) a Volvo XC40 du (FD24 PZF) wedi teithio o ardal Caerlŷr rywbryd ar ôl 10.30am ddydd Sul, 9 Mawrth, i Dde Cymru cyn gadael ychydig ar ôl y digwyddiad.

Ychwanegodd y Ditectif Brif Uwch-arolygydd Hughes:

“Mae angen gwybodaeth arnom am symudiadau'r cerbydau hyn a'r unigolion a oedd yn y cerbydau, gan gynnwys unrhyw ddeunydd dashfwrdd, yn arbennig gan gerbydau masnachol, ar gyfer unrhyw deithiau ddydd Sul. Cafodd y ddau gerbyd eu hatafaelu yn dilyn yr arestiadau neithiwr a byddant yn destun archwiliad fforensig.

“Er bod gennym dimau o swyddogion yn cynnal ymholiadau o dŷ i dŷ ac yn ymchwilio i ddeunydd o gamerâu teledu cylch cyfyng, rwyf hefyd yn apelio am unrhyw ddeunydd dashfwrdd neu ddeunydd camera teledu cylch cyfyng o ardal Llys Illtyd a'r parc manwerthu cyfagos rhwng 5.30pm a 6.30pm ddydd Sul 9 Mawrth a allai ddangos y cerbydau hyn ac unrhyw dystion.

“Mae'r ymchwiliad wedi datblygu'n gyflym, ac rydym yn gweithio'n galed i gadarnhau cymhelliad dros ladd Joanne. Rydym yn ystyried sawl llinell ymholi, gan gynnwys y posibilrwydd ei bod hi wedi dioddef achos o gam-adnabod.

“Byddwn yn annog unrhyw un sydd â gwybodaeth, naill ai am farwolaeth Joanne neu am yr hyn a ddigwyddodd yn yr eiddo yn Llys Illtyd nos Sul, i wneud y peth iawn a chysylltu â ni – gallai'r darn lleiaf o wybodaeth fod yn hollbwysig.”

Gall unrhyw un sydd â gwybodaeth neu ddeunydd fideo, fel deunydd o deledu cylch cyfyng neu gamera dashfwrdd, ei chyflwyno/gyflwyno ar-lein yma.

Fel arall, gallwch gysylltu â ni, gan ddyfynnu rhif digwyddiad 2500075709.

Gellir hefyd roi gwybodaeth yn ddienw drwy Crimestoppers ar 0800 555 111, neu drwy'r ffurflen ar-lein.