Carchar i ddeliwr cyffuriau a wnaeth guddio 44 o roliau o grac a heroin… yn ei geg

Cafodd deliwr cyffuriau o Gaerdydd, a gafodd ei ddarganfod gan swyddogion gyda'i geg yn llawn cyffuriau, ei garcharu yn gynharach yr wythnos hon.

Cafodd Kaine James ei arestio ar 26 Tachwedd (2024) pan weithredodd swyddogion o Dîm Troseddau Cyfundrefnol Caerdydd a'r Fro warant chwilio yn ei gartref.

Cuddiodd James grac cocên a heroin yn ei geg wrth i swyddogion dorri i mewn - gwnaethant weithredu'n gyflym i atal y deliwr cyffuriau rhag llyncu'r cymysgedd angheuol o gyffuriau yn ddamweiniol, sydd wedi'i ddal ar fideo camera a wisgir ar y corff.

Yn ystod chwiliad o'i gartref, daeth swyddogion o hyd i £2,000 mewn ystafell wely ynghyd â ffôn symudol yr oedd yn ei ddefnyddio i redeg dwy linell gyffuriau. Datgelodd negeseuon ar ei ffôn iddo anfon 1,762 o negeseuon yn cynnig cyffuriau Dosbarth A mewn dim ond pythefnos.

Cafodd James, o Trecinon Road, Tredelerch, Caerdydd ei gyhuddo ac aeth ymlaen i bledio'n euog o fod â chrac cocên a heroin yn ei feddiant gyda'r bwriad o'u cyflenwi, ymwneud â chyflenwi'r cyffuriau hynny, a chaffael eiddo troseddol, sef arian.

Cafodd ei garcharu am ddwy flynedd yn Llys y Goron Caerdydd ddydd Mercher 12 Mawrth. Mae'r arian wedi cael ei atafaelu dan y Ddeddf Enillion Troseddau.