Arestiad arall yn dilyn achos o saethu yn Nhonysguboriau

Mae Heddlu De Cymru wedi arestio unigolyn arall fel rhan o ymchwiliad i lofruddiaeth yn Nhonysguboriau.

Bu farw Joanne Penney, 40 oed, ddydd Sul, 9 Mawrth, ar ôl cael ei saethu yn Llys Illtyd. Cynhaliwyd y broses adnabod ffurfiol y prynhawn yma.

Yn gynharach heddiw, cafodd dyn 20 oed o Laneirwg, Caerdydd, ei arestio ar amheuaeth o lofruddiaeth ac mae yn nalfa'r heddlu o hyd.

Mae chwe unigolyn i gyd wedi cael eu harestio ar amheuaeth o lofruddiaeth fel rhan o'r ymchwiliad bellach.

Mae'r dyn 42 oed o Donysguboriau a gafodd ei arestio ddydd Sul wedi cael ei ryddhau heb gyhuddiad, ond mae ar fechnïaeth wrth i ni wneud ymholiadau pellach yn dilyn honiad o ymosod.

Cafodd gwarant i gadw'r pedwar unigolyn a arestiwyd yn Swydd Gaerlŷr ymhellach ei rhoi gan yr Ynadon y prynhawn yma.

Dywedodd y Ditectif Brif Uwch-arolygydd Ceri Hughes:

“Mae ditectifs sy'n gweithio ar yr ymchwiliad hwn yn gwneud cynnydd sylweddol gyda'u hymholiadau.
“Er bod yr arestiad ychwanegol hwn yn ddatblygiad pwysig, mae'r ymchwiliad i farwolaeth Joanne yn parhau ac mae gennym dîm o dditectifs profiadol a staff arbenigol yn gweithio'n galed i gadarnhau amgylchiadau'r digwyddiad trasig hwn.”

Mae Nissan Note lliw beige anarferol (BK61 ZDC) a Volvo XC40 du (FD24 PZF) wedi teithio o ardal Caerlŷr rywbryd ar ôl 10.30am ddydd Sul, 9 Mawrth, i Dde Cymru cyn gadael ychydig ar ôl y digwyddiad.

Ychwanegodd y Ditectif Brif Uwch-arolygydd Hughes:

“Hoffem gael unrhyw fideo dashfwrdd o hyd, yn enwedig o gerbydau masnachol, ar gyfer unrhyw deithiau ddydd Sul, gan gynnwys unrhyw fideo dashfwrdd neu gamera teledu cylch cyfyng o ardal Llys Illtyd a'r parc manwerthu cyfagos rhwng 5.30pm a 6.30pm ddydd Sul 9 Mawrth a allai ddangos y cerbydau hyn ac unrhyw dystion.
“Diolch i bawb sydd wedi siarad â ni neu sydd wedi ein helpu gyda'r ymchwiliad hwn hyd yma.
“Byddwn yn annog unrhyw un sydd â gwybodaeth, naill ai am farwolaeth Joanne neu am yr hyn a ddigwyddodd yn yr eiddo yn Llys Illtyd nos Sul, i wneud y peth iawn a chysylltu â ni – gallai'r darn lleiaf o wybodaeth fod yn hollbwysig.”

Gall unrhyw un sydd â gwybodaeth neu fideo, fel fideo teledu cylch cyfyng neu gamera dashfwrdd, gyflwyno'r rhain ar-lein: https://mipp.police.uk/operation/62SWP25C03-PO1

Fel arall, gallwch gysylltu â ni drwy un o'r ffyrdd canlynol, gan ddyfynnu rhif digwyddiad 2500075709.

• Sgwrs Fyw https://www.south-wales.police.uk/cy-GB/
• Ar-lein https://www.south-wales.police.uk/cy-GB/cysylltu-a-ni/af/ffurflenni-cysylltu-a-ni/darparu-mwy-o-wybodaeth-iw-hychwanegu-at-adroddiad-trosedd/
• 101

*Ffoniwch 999 bob amser mewn argyfwng.*

Gellir hefyd roi gwybodaeth yn ddienw drwy Crimestoppers ar 0800 555 111, neu drwy'r ffurflen ar-lein yn Rhoi Gwybodaeth | Crimestoppers (crimestoppers-uk.org)