Carcharu dyn o Abertawe am ymosodiadau treisgar ar ddau ddioddefwr gwahanol

Mae dyn o Abertawe wedi cael ei garcharu ar ôl iddo ymosod yn dreisgar ar ddau berson gwahanol mewn digwyddiadau ar wahân â bwlch o chwe mis rhyngddynt.

Rhoddodd Korben Crocker, 23 oed o Dreforys, sylw digroeso i fenyw mewn bar ar Wind Street yn Abertawe yn ystod noson allan yn oriau mân bore Sul, 31 Mawrth 2024. Yna, ymosododd yn dreisgar ar gariad y fenyw pan ofynnwyd iddo beidio.

Torrwyd gên y dioddefwr yn ystod yr ymosodiad a bu'n rhaid iddo fynd i'r ysbyty i gael llawdriniaeth i osod platiau metel yn ei ên.

Yn ddiweddarach yn 2024, ymosododd Crocker ar gyn-bartner gan achosi i'w llygaid a'i gwefusau chwyddo a gadael toriadau mewn sawl lle ar ei phen. Yna, ffodd o gartref y dioddefwr.

Er iddo bledio'n ddieuog i'r ddwy drosedd, cafwyd Crocker yn euog yn Llys y Goron Abertawe ac mae bellach wedi cael ei ddedfrydu i dair blynedd yn y carchar.

Dywedodd y Rhingyll Kelly Richards:

“Mae Korben Crocker yn ddyn ifanc treisgar nad yw'n gallu rheoli ei dymer, ac sydd hefyd yn ymfalchïo yn yr anafiadau y mae'n eu hachosi i'w ddioddefwyr fel petaent yn rhyw fath o anrhydedd iddo.

“Ni ddylai'r anafiadau hyn fod yn destun balchder i Korben – maen nhw wedi arwain at ei ddedfrydu i flynyddoedd yn y carchar. Nid oes lle i bobl dreisgar fel Korben mewn cymdeithas, ac mae'n braf gweld y bydd yn cael ei garcharu.

“Rwy'n gobeithio bod ei ddau ddioddefwr yn fodlon ar ganlyniad y llys ac y byddant yn cael cysur o wybod na all Korben achosi unrhyw niwed pellach iddynt.”

I gael cyngor ar gam-drin domestig a sut i roi gwybod amdano, gweler yma: Cyngor ar gam-drin domestig | Heddlu De Cymru