Parhau i chwilio am Charlene Hobbs sydd ar goll

Mae timau chwilio arbenigol yn parhau i chwilio am Charlene Hobbs, sydd ar goll.

Byddant yn chwilio mewn nifer o ardaloedd ledled De Cymru ac ardaloedd heddluoedd cyfagos er mwyn helpu i ddod o hyd i Charlene, nad oes neb wedi ei gweld ers bron chwe mis. Mae'r ardaloedd sy'n cael eu chwilio yn seiliedig ar wybodaeth sydd wedi'i chasglu yn ystod yr ymchwiliad.

Mae swyddogion wedi bod yn cynnal ymholiadau helaeth gan gynnwys chwiliadau mewn cyfeiriadau, eiddo gwag, cerbydau, ac ardaloedd tir agored niferus ledled De Cymru.

Maent hefyd wedi apelio at bobl sy'n byw yn ardaloedd y Sblot a'r Rhath o Gaerdydd i helpu i chwilio drwy edrych yn eu tai allan a'u heiddo gwag lle y gallai Charlene fod yn cysgodi.

Dywedodd y Ditectif Brif Arolygydd Matt Powell, o Heddlu De Cymru:

"Fel rhan o'r ymchwiliad parhaus hwn, mae timau chwilio arbenigol yn chwilio am Charlene ac am unrhyw gliwiau o ran ble y gallai fod, neu ble y mae wedi bod yn ystod y chwe mis diwethaf. Rydym yn parhau i ymgysylltu â'r gymuned leol, drwy siarad â'r rhai rydym wedi nodi y gallai fod ganddynt wybodaeth am leoliad Charlene; a thrwy ddosbarthu taflenni i gyfeiriadau mewn lleoliadau allweddol.

"Mae sawl esboniad posibl dros ddiflaniad Charlene o hyd, ac rwy'n cadw meddwl agored wrth i ni wneud popeth o fewn ein gallu i ganfod beth sydd wedi digwydd iddi. Rwy'n credu bod atebion ynglŷn â lleoliad Charlene yn bodoli yn y gymuned ac y gall aelodau o'r cyhoedd ein helpu i ddychwelyd Charlene at ei theulu. Gall unrhyw wybodaeth, ni waeth pa mor ddibwys ydyw ym marn rhywun, ychwanegu'n sylweddol at yr ymchwiliad, a gellir hefyd rannu gwybodaeth yn ddienw.

“Mae Charlene yn fam, yn chwaer, yn ferch ac yn ffrind i lawer. Fel ni, mae pob un ohonynt yn poeni'n arw am ei llesiant ac yn awyddus iawn i gael atebion."

Y tro diwethaf i Charlene gael ei gweld yn bendant oedd mewn llun a dynnwyd ar ffôn symudol mewn eiddo yn Broadway, Adamsdown, am 06:07am ar 24 Gorffennaf, 2024. Y diwrnod cyn hynny, 23 Gorffennaf, 2024, gwelwyd Charlene ar CCTV ym Morrisons Local, Adamsdown

Roedd ei gwallt mewn 'bun', ac roedd yn gwisgo top tywyll heb strapiau, gyda thatw o ddraig yn weladwy ar ei chefn.

Os gallwch helpu, cysylltwch â Heddlu De Cymru, gan ddyfynnu'r cyfeirnod 2400353044.

Gellir cyflwyno gwybodaeth a deunydd fideo oddi ar ddyfeisiau fel ffonau symudol, camerâu teledu cylch cyfyng, clychau drws neu gamerâu dashfwrdd drwy'r ddolen hon: https://mipp.police.uk/operation/62SWP24B95-PO1

• Sgwrs Fyw https://www.south-wales.police.uk/cy-GB/
• Cysylltwch â ni drwy https://www.south-wales.police.uk/cy-GB/cysylltu-a-ni/af/ffurflenni-cysylltu-a-ni/darparu-mwy-o-wybodaeth-iw-hychwanegu-at-adroddiad-trosedd/
• 101
• Ffoniwch 999 bob amser mewn argyfwng