Parhau i chwilio am Charlene Hobbs sydd heb gael ei gweld ers bron chwe mis

 Mae'r heddlu yng Nghaerdydd yn parhau i ymchwilio i ddiflaniad Charlene Hobbs sy'n 35 oed, nad yw wedi cael ei gweld ers bron chwe mis.

Mae swyddogion wedi cynnal ymholiadau helaeth gan gynnwys chwiliadau mewn sawl cyfeiriad, eiddo gwag, cerbydau, ac ardaloedd tir agored ledled De Cymru.

Maent nawr yn apelio ar y bobl sy'n byw yn Y Sblot a'r Rhath i helpu i chwilio drwy edrych yn eu tai allan a'u heiddo gwag.

Dywedodd y Ditectif Brif Arolygydd Matt Powell, o Heddlu De Cymru:

"Fel rhan o'r chwiliad parhaus, rydw i'n annog unrhyw un sy'n byw yn ardaloedd Y Sblot a'r Rhath i edrych yn eu heiddo gwag, neu unrhyw siediau neu eu tai allan y maent yn berchen arnynt, lle gallai Charlene fod wedi canfod lloches ac i gysylltu â ni ar unwaith os bydd gennych unrhyw wybodaeth a allai fod o gymorth i ni ddod o hyd iddi.

"Mae llawer o esboniadau posibl am ddiflaniad Charlene, ac rydym yn cadw meddwl agored wrth i ni sefydlu beth sydd wedi digwydd iddi.
“Mae Charlene yn fam, yn chwaer, yn ferch ac yn ffrind i lawer. Fel ni, maent i gyd yn bryderus iawn am ei llesiant ac yn ysu i gael atebion."

Y tro diwethaf i Charlene gael ei gweld yn bendant oedd mewn llun a dynnwyd ar ffôn symudol mewn eiddo yn Broadway, Adamsdown, am 06:07am ar 24 Gorffennaf, 2024. Y diwrnod cyn hynny, 23 Gorffennaf, 2024, gwelwyd Charlene ar CCTV ym Morrisons Local, Adamsdown.

Roedd ei gwallt mewn 'bun', ac roedd yn gwisgo top tywyll heb strapiau, gyda thatw o ddraig yn weladwy ar ei chefn.

Os gallwch helpu, cysylltwch â Heddlu De Cymru, gan ddyfynnu'r cyfeirnod 2400353044.

Gellir cyflwyno gwybodaeth a deunydd fideo ar ddyfeisiau megis ffonau symudol, camerâu teledu cylch cyfyng, clychau drws neu gamerâu dashfwrdd drwy'r ddolen hon: https://mipp.police.uk/operation/62SWP24B95-PO1

🗪 Sgwrs Fyw https://www.south-wales.police.uk/cy-GB/
💻Cysylltwch â ni drwy https://www.south-wales.police.uk/cy-GB/cysylltu-a-ni/af/ffurflenni-cysylltu-a-ni/darparu-mwy-o-wybodaeth-iw-hychwanegu-at-adroddiad-trosedd/ 
📞 101
Ffoniwch 999 bob amser mewn argyfwng.