Dedfryd oes i ddyn a lofruddiodd fam annwyl i ddau o blant yng Nghaerdydd

Mae dyn wedi cael ei ddedfrydu i garchar am oes am lofruddio mam i ddau, Victoria Thomas yng Nghaerdydd.

Roedd Alcwyn Thomas wedi treulio'r diwrnod yn yfed yn drwm ac yn cymryd cocên cyn tagu Victoria, 45 oed, i farwolaeth yn y tŷ yr oeddent yn ei rannu ar Heol Caerffili yn Birchgrove.

Cyfaddefodd Thomas, 44 oed, i ddynladdiad ond dadleuodd mai  ‘gweithred rywiol a aeth o'i le’ oedd yn gyfrifol am farwolaeth Victoria ac y bu farw yn ystod ‘mygu erotig’.

Gwadodd lofruddiaeth ond cafodd ei ganfod yn euog yn dilyn treial yn Llys y Goron Caerdydd. Mae bellach wedi cael ei ddedfrydu i garchar am oes a bydd yn y carchar am o leiaf 20 mlynedd.

Dangosodd deunydd fideo teledu cylch cyfyng o brynhawn dydd Llun, 19 Awst 2024, y cwpl di-briod yn ymweld â The New Inn ar Ffordd Caerffili cyn mynd ymlaen i Bingo Clwb 3000 yn ardal Gabalfa gydag aelodau o deulu'r diffynnydd. 

Dywedwyd ei fod yn ddadleuol ac yn oriog y noson honno. Roedd wedi yfed 16 peint o lager ac wedi bod yn defnyddio cocên. Dangosodd deunydd fideo teledu cylch cyfyng pellach y tu allan i'r neuaddau bingo Alcwyn Thomas yn cymryd cocên a'r cwpl yn dadlau, yn ôl pob golwg, cyn mynd i mewn tacsi.

Cafodd Victoria ei gweld yn fyw am y tro olaf am 9.26pm pan aeth y cwpl adref.

Ychydig ar ôl 11pm, anfonodd Thomas negeseuon testun at ei chwiorydd yn dweud, “Sorry I done something so bad”.

Cafodd corff Victoria ei ganfod yn ystod oriau mân bore dydd Mawrth, 20 Awst ar ôl i nith Thomas, a oedd yn poeni ar ôl gweld y negeseuon testun, fynd i weld a oedd hi'n iawn.

Pan gyrhaeddodd yr heddlu, roedd Thomas yn cysgu yn ystafell wely'r cwpl ar y llawr canol. Atebodd ‘dim sylw’ yn ystod cyfweliad yr heddlu ond yn ddiweddarach, cyfaddefodd i dagu Victoria yn fwriadol.

Dywedodd yr Uwch-swyddog Ymchwilio, y Ditectif Brif Arolygydd Matt Powell:

“Roedd Victoria Thomas yn ferch, yn fam, yn chwaer, yn fodryb ac yn nith annwyl iawn.
“Mae aelodau ei theulu wedi'u llorio, ac maent wedi dangos amynedd ac urddas aruthrol yn ystod y cyfnod torcalonnus hwn. Rydym yn parhau i feddwl amdanynt heddiw.
“Nid yw Alcwyn Thomas wedi dangos unrhyw edifeirwch a dadleuodd mai rhyw fath o weithred rywiol a aeth o'i le oedd marwolaeth Victoria. Ni wnaeth unrhyw ymdrech i'w hadfywio na cheisio cymorth ar ei chyfer, ac ar ôl ei lladd, aeth i gysgu yn eu hystafell wely.
“Nawr, mae'n rhaid iddo wynebu realiti'r hyn a wnaeth a threulio amser hir iawn yn y carchar.”

Mewn datganiad, dywedodd teulu Victoria:

“Fel teulu, rydym yn ddiolchgar iawn bod cyfiawnder wedi cael ei gyflawni yn yr achos hwn.
“Hoffem ddiolch i bawb dan sylw yn Heddlu De Cymru sydd, yn ogystal â chynnal ymchwiliad trylwyr a llwyddiannus, wedi cynnig cefnogaeth wych i bob un ohonom drwyddi draw.
“Diolch i Cymorth i Ddioddefwyr am bopeth y mae wedi ei gynnig i'r teulu er mwyn ceisio gwneud ein bywydau ychydig yn haws.
“Hoffem hefyd ddiolch i Wasanaeth Erlyn y Goron ac yn enwedig y tîm a fu'n paratoi'r achos llys a Mike Jones CB am ei gyflwyniad rhagorol o'r dystiolaeth a arweiniodd at euogfarnu llofrudd Vicki yn llwyddiannus.
“Ni fyddwn fyth yn cael Vicki yn ôl a bydd yn rhaid i ni fyw gyda hyn am weddill ein hoes, ond mae gwybod na fydd ei llofrudd yn byw yn rhydd am weddill ei oes yn rhoi rhywfaint o gysur i ni.”