Dyn o Gaerdydd wedi'i euogfarnu o lofruddio ei bartner yn eu cartref yn Birchgrove

Cafodd y fam i ddau, Victoria Thomas, ei thagu i farwolaeth gan ei phartner, Alcwyn Thomas, ar ôl iddo dreulio'r diwrnod yn yfed yn drwm ac yn cymryd cocên.

Cafodd Victoria, 45 oed, ei chanfod mewn ystafell sbâr ar lawr uchaf y tŷ roeddent yn ei rannu ar Ffordd Caerffili yn Birchgrove, Caerdydd.

Cyfaddefodd Thomas, 44 oed, i ddynladdiad ond dadleuodd mai  ‘gweithred rywiol a aeth o'i le’ oedd yn gyfrifol am farwolaeth Victoria ac y bu farw yn ystod ‘mygu erotig’.

Gwadodd lofruddiaeth ond cafodd ei ganfod yn euog heddiw (dydd Mercher 26 Mawrth) yn dilyn treial yn Llys y Goron Caerdydd.

Dangosodd deunydd fideo teledu cylch cyfyng o brynhawn dydd Llun, 19 Awst 2024, y cwpl di-briod yn ymweld â The New Inn ar Ffordd Caerffili cyn mynd ymlaen i Bingo Clwb 3000 yn ardal Gabalfa gydag aelodau o deulu'r diffynnydd.

Dywedwyd ei fod y ddadleuol ac yn oriog y noson honno. Roedd wedi yfed 16 peint o lager ac wedi bod yn defnyddio cocên.

Dangosodd deunydd fideo teledu cylch cyfyng pellach y tu allan i'r neuaddau bingo Alcwyn Thomas yn cymryd cocên a'r cwpl yn dadlau, yn ôl pob golwg, cyn mynd i mewn tacsi.

Cafodd Victoria ei gweld yn fyw am y tro olaf am 9.26pm pan aeth y cwpl adref.

Ychydig ar ôl 11pm, anfonodd Thomas negeseuon testun at ei chwiorydd yn dweud,

“Sorry I done something so bad”.

Cafodd corff Victoria ei ganfod yn ystod oriau mân bore dydd Mawrth, 20 Awst ar ôl i nith Thomas, a oedd yn poeni ar ôl gweld y negeseuon testun, fynd i weld a oedd hi'n iawn.

Pan gyrhaeddodd yr heddlu, roedd Thomas yn cysgu yn ystafell wely'r cwpl ar y llawr canol. Atebodd ‘dim sylw’ yn ystod cyfweliad yr heddlu ond yn ddiweddarach, cyfaddefodd i dagu Victoria yn fwriadol.

Dywedodd yr Uwch-swyddog Ymchwilio, y Ditectif Brif Arolygydd Matt Powell:

“Roedd Victoria Thomas yn ferch, yn fam, yn chwaer, yn fodryb ac yn nith annwyl iawn.

“Mae aelodau ei theulu wedi'u llorio, ac maent wedi dangos amynedd ac urddas aruthrol yn ystod y cyfnod torcalonnus hwn. Rydym yn parhau i feddwl amdanynt heddiw.

“Ar ôl lladd Victoria yn yr ystafell sbâr, aeth Alcwyn Thomas i gysgu yn ystafell wely'r cwpl.

“Ni wnaeth unrhyw ymdrech ar unrhyw adeg i adfywio Vicki na cheisio cymorth ar ei chyfer.

“Hoffem ddiolch i'r holl dystion a gynorthwyodd gyda'r ymchwiliad, yn ogystal â'r tîm erlyn.”

Bydd Thomas yn cael ei ddedfrydu ar 24 Ebrill.