Ymgyrch trwyddedu yn mynd i'r afael ag yfed dan oed yng Nghastell-nedd Port Talbot

Cynhaliodd tîm Trwyddedu Abertawe a Chastell-nedd Port Talbot ymgyrch ar nifer o dafarndai yn ardal Llansawel ar ôl i gudd-wybodaeth ddiweddar awgrymu bod rhai o'r safleoedd hyn yn gwerthu alcohol i bobl dan oed yn rheolaidd.

Cefnogwyd yr ymgyrch, a gafodd ei chydlynu ar y cyd ag adran drwyddedu Cyngor Castell-nedd Port Talbot, gan gwnstabliaid gwirfoddol hefyd. Pan ymwelodd y tîm â safleoedd trwyddedig yn yr ardal, gwelwyd bod nifer o bobl dan 18 oed yn yfed yn un o'r sefydliadau – roedd rhai ohonynt wedi meddwi a chadarnhawyd bod staff y bar wedi gwerthu alcohol iddynt heb ofyn am fanylion adnabod.

Aeth swyddogion â'r plant hyn adref, lle cawsant eu gadael yng ngofal eu teuluoedd.

Mae ymholiadau yn mynd rhagddynt o hyd. Caiff camau cadarnhaol eu cymryd yn erbyn y safleoedd trwyddedig a'r staff a oedd yn gyfrifol am werthu'r alcohol. Mae diogelu plant rhag niwed yn un o'r pedwar amcan Trwyddedu – rhaid i safleoedd trwyddedig a goruchwylwyr safleoedd dynodedig sicrhau eu bod yn cynnal ac yn cyflawni'r amcanion hyn. Drwy werthu alcohol i bobl dan oed, maent yn peryglu diogelwch a llesiant y plant hynny ac yn wynebu'r risg o gael eu herlyn eu hunain.

Dywedodd y Rhingyll James Ponting:

“Bydd y mathau hyn o ymgyrchoedd, gan gynnwys ymgyrchoedd prawf-brynu, yn cael eu cynnal ledled ardal Abertawe a Chastell-nedd Port Talbot yn rheolaidd.

“Rydym yn annog unrhyw un sydd ag unrhyw wybodaeth neu gudd-wybodaeth a fydd yn ein helpu ni i ddiogelu plant rhag mynd i safleoedd trwyddedig nad ydynt yn dilyn y ddeddfwriaeth ofynnol i gysylltu drwy ffonio 101.”