Carchar i ddelwyr cyffuriau a ddaliodd bachgen o Gaerdydd fel caethwas cyffuriau
Cynnwys y prif erthygl
Mae dau ddeliwr cyffuriau a ddaliodd bachgen yn ei arddegau o Gaerdydd yn gaeth mewn fflat yn Llundain a'i orfodi i greu pecynnau o grac cocên a heroin wedi cael eu carcharu.
Daethpwyd o hyd i'r bachgen pan ymwelodd swyddogion yr Heddlu Metropolitanaidd â'r cyfeiriad yn chwilio am rywun yr oedd yr heddlu yn chwilio amdano ar gyfer mater arall.
Ymddangosodd Abdullahi Dable, 26 oed, a Malik Touray, 20 oed, gerbron Llys y Goron Caerdydd ddydd Llun pan gawsant eu carcharu am gyfanswm o wyth mlynedd.
Roedd teulu'r dioddefwr yn yr achos, a oedd yn 16 oed ar y pryd, wedi rhoi gwybod ei fod ar goll ar 13 Chwefror - bedwar diwrnod cyn iddo gael ei ganfod.
Cafodd ei orfodi i ddweud wrth ei deulu ei fod yn gweithio ar safle adeiladu am wythnos ym Mryste, ond roedd ganddynt bryderon a gwnaethant gysylltu â Heddlu De Cymru i roi gwybod ei fod ar goll.
Roedd yn cael ei ddal mewn fflat yn Llundain, gan gael ei orfodi i drefnu crac cocên a heroin i mewn i ddeliadau stryd. Roedd Abdullahi Dable a Malik Touray wedi ei gludo mewn tacsi o Gaerdydd i Lundain, gan fygwth ei niweidio pe bai'n siarad ag unrhyw un arall am yr hyn yr oedd yn ei wneud neu'n ceisio gadael. Ni chai hyd yn oed adael i brynu bwyd, a oedd yn lle hynny yn cael ei gludo iddo.
Roedd swyddogion yr Heddlu Metropolitanaidd yn chwilio am rywun arall pan welsant y bachgen o Gaerdydd ar 17 Chwefror.
Ond wrth iddynt fynd i mewn i'r fflat, daethant o hyd iddo mewn ystafell dan glo ynghyd â phentyrrau o heroin ar fwrdd coffi.
Pan ddaeth yr amgylchiadau iddo fod yn Llundain i'r amlwg, lansiodd Heddlu De Cymru ymchwiliad i'r camfanteisio arno.
Canolbwyntiodd ymchwiliad yr heddlu ar waith fforensig digidol a chysylltodd dyfeisiau a oedd yn perthyn i Dable a Touray â chyfres o negeseuon rhyngddynt a'r dioddefwr. Yn ystod taith y bachgen i Lundain, dywedodd Dable, o dan y ffugenw ‘Billy’, wrtho i lawrlwytho'r ap Telegram a fyddai'n cael ei ddefnyddio er mwyn cysylltu ag ef yn y dyfodol. Yn ystod galwad Facetime, rhybuddiodd Dable y bachgen i ddilyn y cyfarwyddiadau er mwyn osgoi cael ei frifo. Roedd tystiolaeth hefyd eu bod wedi ceisio recriwtio nifer o bobl ifanc eraill agored i niwed yn eu harddegau o Gaerdydd.
Cafodd y ddau ddyn eu harestio a'u cyhuddo o gynllwynio i drefnu neu hwyluso taith unigolyn arall gyda'r bwriad o gamfanteisio a chynllwynio i gyflenwi crac cocên a heroin. Cafodd Abdullahi Dable ei garcharu am bedair blynedd a chwe mis, a chafodd Malik Touray ei garcharu am dair blynedd a chwe mis mewn sefydliad i droseddwyr ifanc.
Dywedodd y swyddog a fu'n ymwneud â'r Achos, y Ditectif Gwnstabl Anna Chad Nixon:
“Roedd y dioddefwr yn yr achos hwn yn agored i niwed ac yn cael ei drin yn greulon gan y dynion hyn.
“Gwyddai'r ddau ddyn eu bod yn recriwtio plentyn i'w gweithgareddau troseddol peryglus, heb fynegi unrhyw bryder i'w les a dim ond yn meddwl amdanynt eu hunain a'u helw o gyffuriau.
“Yn yr achos hwn, roedd y dioddefwr yn pryderu amdano'i hun a'i deulu i'r graddau nad oedd am barhau i erlyn. Er hynny, bu modd i ni greu achos cadarn iawn yn erbyn y ddau ddyn a pharhau ag erlyniad heb ddioddefwr.
“Nid oes lle i gamfanteisio a chaethwasiaeth yn ein cymunedau yn Ne Cymru a byddwn yn gwneud popeth o fewn ein gallu i arestio'r sawl sy'n ymwneud â nhw.”
Dysgwch fwy am gamfanteisio'n droseddol ar blanthild, gan gynnwys arwyddion i gadw llygad amdanynt, a chyngor, cymorth a chefnogaeth i blant a rhieni neu ofalwyr.