Dydd y Cofio | Heddlu De Cymru

Heddiw, cafodd y Gwasanaeth Coffa blynyddol ei gynnal ym mhencadlys yr heddlu o dan arweiniad y Prif Gwnstabl Jeremy Vaughan a Chomisiynydd yr Heddlu a Throseddu Emma Wools, a'i weinyddu gan gaplan yr heddlu, y Parchedig Robert Coyne.

Yn ystod y Gwasanaeth, gosodwyd torchau wrth ein Cofeb Ryfel i anrhydeddu'r rhai a fu farw wrth wasanaethu yn lluoedd arfog ein gwlad, ac wrth ein Deial Haul Coffa i gofio am swyddogion a staff yr heddlu a fu farw wrth wasanaethu ein cymunedau.

Dywedodd y Prif Gwnstabl Jeremy Vaughan:

“Rwy'n sefyll yma o'ch blaen heddiw i gofio am y rhai a wnaeth yr aberth eithaf wrth wasanaethu eu gwlad.

“Mae hwn yn achlysur mor bwysig, ac mae'n briodol ein bod yn parhau i ddangos ein parch a'n diolch i'r rhai a gollwyd wrth wasanaethu, nid yn unig fan hyn, ond ledled y wlad. Mae seremonïau fel y seremoni hon yn dod â'n cymunedau at ei gilydd, i ddangos ein dyngarwch ac i gryfhau ein hymdeimlad o gydlyniant yn ystod adegau o gynnwrf ac ansicrwydd.

“Gadewch i ni fyfyrio, nid yn unig ar gost gwasanaethu, ond hefyd ar yr anrhydedd o wneud hynny. Mae gwaddol ein swyddogion a fu farw, y swyddogion milwrol a'n cydweithwyr ym mhob un o'r gwasanaethau brys a chyhoeddus, yn parhau yn y gwaith a wnawn, y bywydau a gyffyrddwn a'r cymunedau rydym yn eu diogelu. Mae eu dewrder, eu teyrngarwch i wasanaethu a'u haberth eithaf yn ein hysbrydoli i symud ymlaen, ni waeth beth fo'r heriau rydym yn eu hwynebu.

“Ni chânt fyth eu hanghofio.”

I gael rhagor o wybodaeth am y digwyddiad heddiw, darllenwch Trefn y Gwasanaeth.