Anrhydedd y Flwyddyn Newydd am fod yn sbardun y tu ôl i brosiectau sy'n gwneud cymunedau Caerdydd yn fwy diogel

Rydym yn falch iawn bod un o'n swyddogion cymorth plismona yn y gymdogaeth wedi cael BEM yn Rhestr Anrhydeddau'r Flwyddyn Newydd.

Mae Carly Hart, sy'n gweithio yn ardaloedd Llanisien, Llanedeyrn, Tredelerch a Llaneirwg o Gaerdydd, wedi cael ei chydnabod am ei gwasanaethau i blismona ac i'r gymuned leol.

Ac fe gyfaddefodd, pan dderbyniodd yr hysbysiad, ei bod yn tybio y byddai'n ymwneud â gwasanaeth rheithgor, gan ddweud:

“Rwyf mor ddiolchgar fy mod hyd yn oed wedi cael fy ystyried am anrhydedd ar y lefel hon, heb sôn am ei dderbyn.”

Mae swyddogion cymorth plismona yn y gymdogaeth yn cefnogi eu timau plismona mewn lifrai lleol, gan eu galluogi – ymysg pethau eraill – i blismona'r strydoedd yn fwy effeithiol, ymateb yn fwy effeithlon i bryderon lleol, a gwella cysylltiadau â phobl leol.

Ychwanegodd Carly:

“Rydw i dal methu credu'r holl beth, ac am efallai'r tro cyntaf yn fy mywyd, does gen i ddim y geiriau.

“Ni fyddwn yn gallu gwneud y gwaith rwy'n ei wneud heb gydweithwyr rhagorol y tîm plismona cymdogaeth, a'r asiantaethau partner rwy'n gweithio gyda. Nid menter unigol yw plismona cymdogaeth, felly hoffwn hefyd ddweud diolch personol i bob cydweithiwr rwyf wedi cael y fraint o weithio gyda dros y blynyddoedd.

“Rydych chi ond mor dda â'r rhai rydych chi'n gweithio ochr yn ochr â nhw.”

Dywedodd yr Uwch-arolygydd Arabella Rees, o Uned Troseddau Cyfundrefnol Caerdydd a'r Fro:

“Rwyf wrth fy modd bod ymroddiad Carly i wasanaethu ein cymunedau yn nwyrain Caerdydd wedi cael ei gydnabod yn Rhestr Anrhydeddau'r Flwyddyn Newydd.

“Mae Carly yn adnabyddus am ei pharodrwydd eithriadol i weithio a'i dull arloesol o blismona yn y gymdogaeth lle mae'n sbardun y tu ôl i amrywiaeth o brosiectau sydd wedi llwyddo i wneud ein cymunedau'n fwy diogel.

“Ymysg y rhain mae gweithio gydag ysgolion lleol ar amrywiaeth o faterion allweddol fel ymddygiad gwrthgymdeithasol, hyrwyddo prosiect StreetSafe i ddatblygu cyfleoedd i atal trais yn erbyn menywod a merched a chreu cyfleoedd i bobl ifanc ochr yn ochr â Sefydliad Clwb Pêl-droed Caerdydd. Mae ei phroffesiynoldeb, ei hymrwymiad a'i brwdfrydedd wedi gwneud gwahaniaeth mawr ac yn parhau i wneud hynny – rhywbeth sy'n cael ei werthfawrogi gan ei chydweithwyr ym maes plismona ac yn ein sefydliadau partner fel ei gilydd.

“Mae'r anrhydedd hwn yn cydnabod y dyfalbarhad a'r ymroddiad i wasanaethu'r gymuned sy'n rhan o blismona ac sy'n ail natur i Carly. Rwyf mor ddiolchgar am bopeth y mae Carly yn ei wneud ac yn falch iawn o bopeth y mae wedi'i gyflawni.

“Ar ran pawb yn nhîm ehangach Caerdydd a'r Fro, a Heddlu De Cymru cyfan, hoffwn longyfarch Carly yn fawr am y gydnabyddiaeth hon.”