Carcharu troseddwr rhyw â phlant am dros 10 mlynedd

Mae dyn o Gastell-nedd Port Talbot wedi cael ei garcharu am gyflawni sawl trosedd rywiol ar blant.

Cafodd Gareth Phillips, 32 oed o Sgiwen, ryw gyda'i ddioddefwr, a oedd yn 14 oed ar y pryd, yn ei gar ym mis Mawrth 2019. Ddeufis yn ddiweddarach, dechreuodd gwrdd â'r un dioddefwr i gael rhyw yn rheolaidd. Ym mis Tachwedd 2019, roedd eu perthynas yn ‘swyddogol’ – ond gofynnodd Phillips i'r dioddefwr gadw hyn yn gyfrinach.

Ym mis Mai 2021, treisiodd Phillips yr un dioddefwr pan roeddent yn aros mewn gwesty.

Mae wedi cael dedfryd o 10 mlynedd a hanner yn y carchar yn Llys y Goron Abertawe ar ôl cael ei ddyfarnu'n euog o bedwar achos o weithgarwch rhywiol gyda phlentyn ac un achos o dreisio.

Dywedodd y Ditectif Ringyll David Connick:

“Mae Gareth Phillips yn unigolyn peryglus iawn a fanteisiodd ar ei ddioddefwr dan oed am nifer o flynyddoedd. Dangosodd ymddygiad rheolaethol cynyddol yn ystod eu perthynas, a byddai'n gwneud esgusodion i fod yn agos at deulu diarwybod y dioddefwr er mwyn sicrhau ei fod yn gallu cyrraedd y dioddefwr yn hawdd.

“Pan geisiodd ei ddioddefwr ddod â'r berthynas i ben, defnyddiodd reolaeth drwy orfodaeth i atal hyn, gan gynnwys bygwth hunanladdiad.

“Hoffwn dalu teyrnged i ddewrder y dioddefwr wrth gysylltu â ni ar ôl dioddef blynyddoedd o gamdriniaeth gan Gareth Phillips. Mae'r dioddefwr wedi dangos dewrder eithriadol drwy gydol yr ymchwiliad a'r treial.

“Mae Heddlu De Cymru yn parhau'n ymrwymedig i fynd i'r afael â phob math o gam-drin rhywiol ac mae gennym swyddogion arbenigol sy'n cael eu neilltuo i bob achos. Rydym yn cydweithio â'n hasiantaethau partner i gefnogi'r rhai y mae'r math hwn o gam-drin wedi effeithio arnynt, a byddwn yn annog unrhyw un i roi gwybod am unrhyw fath o gam-drin i'r heddlu. Ymchwilir i bob adroddiad yn drylwyr.”

Gellir dod o hyd i'n canllawiau ar sut i roi gwybod am achos o dreisio, ymosodiad rhywiol neu droseddau rhywiol eraill yma: Sut i riportio treisio, ymosodiad rhywiol neu droseddau rhywiol eraill | Heddlu De Cymru (south-wales.police.uk)

Mae ein gwybodaeth mewn perthynas â chymorth i ddioddefwyr achosion o dreisio ac ymosodiadau rhywiol ar gael yma: Treisio, ymosod rhywiol a throseddau rhywiol eraill | Heddlu De Cymru (south-wales.police.uk)