Dyn o Ben-y-bont ar Ogwr wedi'i ddedfrydu i 24 mlynedd yn y carchar am droseddau rhyw plant.

Gwnaeth Steven Felix, 36 oed, o Fracla, Pen-y-bont ar Ogwr, gam-drin plentyn dan 13 oed yn rhywiol, rhwng haf 2019 a diwedd 2020.

Cafodd swyddogion adroddiad am y gamdriniaeth ym mis Mai 2021.Yn dilyn ymchwiliad, cafodd ei gyhuddo o 24 o droseddau trais a gweithgarwch rhywiol â phlentyn.

Ddydd Gwener, 22 Mawrth, cafodd ei ddedfrydu i 24 mlynedd yn y carchar, a chafodd orchymyn trwyddedu chwe blynedd ychwanegol a Gorchymyn Atal Niwed Rhywiol am oes.

Dywedodd y Ditectif Ringyll Jo Williams-Smith: "Mae Steven Felix yn unigolyn rheibus a fanteisiodd ar blentyn a'i gam-drin mewn ffordd erchyll.

"Bydd yn rhaid i'r dioddefwr yn yr achos hwn fyw gyda'r atgof o'r gamdriniaeth ofnadwy hon am weddill ei oes. Rwy'n falch bod y llys wedi cydnabod hyn drwy roi dedfryd hir o garchar i Steven Felix, sef y canlyniad yr oedd yr achos yn ei haeddu. Hoffwn dalu teyrnged bersonol i'r dioddefwr am gysylltu â ni ac am barhau â'r ymchwiliad. Diolch i'w ddewrder, gwnaethom sicrhau erlyniad llwyddiannus.

"Rwy'n gobeithio y bydd y ddedfryd hon yn annog dioddefwyr eraill camdriniaeth rywiol i gysylltu â ni. Byddwn yn eich credu ac yn gwneud popeth o fewn ein gallu i ddwyn troseddwyr o flaen eu gwell, ni waeth pryd y digwyddodd y drosedd.

"Rydym yn cymryd pob honiad o gamdriniaeth rywiol o ddifrif. Mae gennym dimau sydd wedi'u hyfforddi'n arbennig sy'n ymchwilio i droseddau rhywiol ac yn rhoi cymorth i ddioddefwyr. Os ydych wedi profi troseddau o'r fath, byddwn yn gwrando arnoch, a byddwn yn eich credu."

Rydym wedi creu llyfryn sy'n rhoi gwybodaeth i unrhyw un sy'n ystyried rhoi gwybod am drais neu ymosodiad rhywiol – cliciwch ar y ddolen hon https://www.south-wales.police.uk/cy-GB/heddluoedd/heddlu-de-cymru/ardaloedd/campaigns/ymgyrchoedd/rhoi-gwybod-am-droseddau-rhywiol-gwybodaeth-a-chanllaw-ategol/