Pwerau ychwanegol i fynd i'r afael ag ymddygiad gwrthgymdeithasol yn Nhreorci

Mae swyddogion yr heddlu yn Nhreorci wedi cael pwerau ychwanegol i ymdrin â phobl ifanc sy'n achosi problemau ymddygiad gwrthgymdeithasol y penwythnos hwn.

Cafodd y penderfyniad ei wneud yn dilyn achosion o ymddygiad gwrthgymdeithasol yn ddiweddar yn yr ardal a achosodd bryder ymysg preswylwyr.

Bydd y gorchymyn gwasgaru, a roddir o dan Ddeddf Ymddygiad Gwrthgymdeithasol, Troseddu a Phlismona 2014, yn berthnasol i'r rhai sydd yn 10 oed neu'n hŷn, a bydd ar waith tan 8.00pm nos Sul 19 Mai.

Mae'r gorchymyn yn cwmpasu'r ardaloedd sy'n cynnwys tir clwb criced Treorci ac ardaloedd cysylltiedig y parc, tir rygbi Treorci, A4061 y Stryd Fawr o gyffordd Stryd y Capel hyd at gyffordd Cemetery Road. Mae hefyd yn cynnwys Station Road o'r Stryd Fawr i Park Crescent.

Yn unol â'r ddeddfwriaeth hon, caiff unrhyw un rhwng 10 a 16 oed ei ddanfon i gyfeiriad ei gartref neu fan diogel. Bydd gan Swyddogion yr Heddlu a PCSOs hefyd y pŵer i atafaelu unrhyw eiddo y bydd swyddogion yn amau ei fod yn cael ei ddefnyddio i achosi ymddygiad gwrthgymdeithasol.

Dywedodd y Prif Arolygydd Emma Hampton: “Ni fyddwn yn goddef achosion o yfed dan oed neu unrhyw fath o ymddygiad annerbyniol arall yn yr ardal. Gofynnaf i rieni a gwarcheidwaid atgoffa eu plant i osgoi'r ardal hon y penwythnos hwn.

“Bydd gennym hefyd adnoddau ychwanegol a byddwn yn cynnal patrolau amlwg iawn yn y gymuned er mwyn rhoi tawelwch meddwl i'r cyhoedd ac ymdrin ag unrhyw faterion i wneud yn siwr bod y preswylwyr yn cadw ac yn teimlo'n ddiogel.”

“Dewch i siarad ag aelod o'r timau os bydd gennych unrhyw bryderon. Neu, gallwch gysylltu â ni gydag unrhyw wybodaeth sydd gennych ar-lein drwy ein gwefan neu drwy ffonio 101.”