Ymgyrch Lathyrus yn mynd i'r afael â'r defnydd anghyfreithlon o e-feiciau yng nghanol dinas Abertawe
Cynnwys y prif erthygl
Yr wythnos diwethaf, cymerodd swyddogion gamau gweithredu i fynd i'r afael â'r defnydd anghyfreithlon a gwrthgymdeithasol o e-feiciau ac achosion o ddwyn beiciau yng nghanol dinas Abertawe fel rhan o Ymgyrch Lathyrus.
Mae'r ymgyrch, a sefydlwyd mewn ymateb i ddigwyddiadau parhaus o ddwyn beiciau a defnydd gwrthgymdeithasol o e-feiciau yng nghanol y ddinas, wedi derbyn sawl cwyn gan aelodau pryderus o'r cyhoedd ynghylch cyflymder e-feiciau o amgylch canol y ddinas.
Ddydd Gwener (12 Gorffennaf), anfonwyd swyddogion i sawl lleoliad o amgylch y ddinas, gyda phabell a stondin marcio beiciau wedi'u gosod yng Ngerddi'r Castell. Rhoddodd y swyddogion addysg a chyngor ar atal troseddau i ddefnyddwyr beic, a defnyddio citiau marcio beic sy'n darparu cod unigryw y gellir ei gofrestru â gwefan Selectamark - https://www.selectamark.co.uk/ – er mwyn rhoi ffordd i'r heddlu adnabod perchennog beic sydd wedi cael ei ddwyn ar unwaith.
Cymerodd swyddogion gamau gorfodi hefyd, ac yn sgil hyn:
- Cafodd tri beic eu hatafaelu am eu bod wedi cael eu haddasu'n anghyfreithlon;
- Cafodd dau unigolyn eu dal yn gyrru cerbyd heb yswiriant;
- Cafodd un unigolyn ei arestio am fod â chyffuriau Dosbarth B wedi'u cuddio mewn bag dosbarthu yn ei feddiant gyda'r bwriad o'u cyflenwi.
- Cafodd cyfanswm o 14 o gitiau marcio beic a 12 o gloeon eu dosbarthu.
Arweiniwyd Lathyrus gan Gwnstabl Gareth Jennings o Dîm Plismona yn y Gymdogaeth Canol y Ddinas, ac roedd yn cynnwys swyddogion a PCSOs eraill.
Bu'r swyddogion yn gweithio mewn partneriaeth â Cheidwaid Canol y Ddinas a swyddogion Mewnfudo. Cafodd dau unigolyn eu harestio am droseddau mewnfudo hefyd.
Dywedodd PC Jennings:
"Rydym yn ymrwymedig i ymateb i anghenion a phryderon a godwyd gan y gymuned a byddwn yn parhau i chwarae rhan yn tarfu ar Ymddygiad Gwrthgymdeithasol a throseddau ar ein strydoedd.”