Dyn o Borthcawl wedi ei ddedfrydu ar ôl iddo gyflawni 12 o droseddau.
Cynnwys y prif erthygl
Mae Daniel Kiddier, 36 oed, wedi cael gorchymyn atal amhenodol a dedfryd o bum mlynedd a thri mis yn y carchar ar ôl iddo gael ei ddyfarnu'n euog am 12 o droseddau.
Cafodd Kiddier, o Heol Newydd, Porthcawl, ei ddedfrydu heddiw yn Llys y Goron Caerdydd. Fe'i cafwyd yn euog yn flaenorol mewn treial yn Llys y Goron Casnewydd yn gynharach y mis hwn am 12 achos o ymddygiad rheolaethol a gorfodaethol, ac am un achos o ymosod gan achosi niwed corfforol gwirioneddol.
Dywedodd y Ditectif Gwnstabl Tyler Rowland: "Mae Daniel Kiddier wedi cael ei ddedfrydu heddiw am 12 o droseddau cam-drin domestig.
"Hoffwn ddiolch i'r dioddefwr yn yr achos hwn am ei ddewrder yn rhoi gwybod i ni am y digwyddiadau hyn, ac am fynd drwy'r broses farnwrol.
“Mae dioddef o ymddygiad rheolaethol a gorfodaethol yn cael effaith enfawr ar y dioddefwr, yn gorfforol, yn feddyliol ac yn emosiynol.
"Mae Daniel Kiddier bellach wedi cael ei ddedfrydu i fwy na phum mlynedd yn y carchar, ynghyd â chael gorchymyn atal amhenodol. Croesawaf y ddedfryd hon, sy'n dangos y caiff cam-drin domestig ei gymryd o ddifrif, nid yn unig Heddlu De Cymru, ond gan y llysoedd hefyd.
"Byddwn yn annog unrhyw un sydd wedi dioddef cam-drin domestig o unrhyw fath i gamu ymlaen a rhoi gwybod i ni, neu gysylltu'n ddienw â Crimestoppers."
Mae cam-drin domestig yn effeithio ar bobl o bob cefndir ac mewn llawer o wahanol ffyrdd. Drwy'r ddolen isod, gallwch ddarganfod yr hyn sy’n cael ei gyfrif fel camdrin domestig, sut i roi gwybod amdano a sut, o dan Gyfraith Clare, y gallwch ddarganfod a oes gan eich partner hanes o drais neu gam-drin domestig.