Cynllun LEAD i annog perchnogaeth cŵn cyfrifol wedi ei lansio ym Morgannwg Ganol

Mae menter i hybu perchnogaeth cŵn diogel a chyfrifol wedi cael ei lansio ym Morgannwg Ganol.

Mae prosiect LEAD (Ymwybyddiaeth Amgylcheddol Leol ar Gŵn), a arweinir gan Heddlu De Cymru ar y cyd â sawl asiantaeth partner gan gynnwys awdurdodau lleol a landlordiaid cymdeithasol cofrestredig, wedi cael ei ddylunio i wella'r ymgysylltiad â pherchnogion cŵn o bob brîd.

Nod y broses ragweithiol yw lleihau'r risg sydd wedi codi mewn cymunedau drwy berchnogaeth cŵn anghyfrifol ac ymddygiad gwrthgymdeithasol, drwy ymgysylltu, addysg ac ymyrraeth gynnar.

Bydd LEAD yn galluogi partneriaid i rannu cudd-wybodaeth ac i roi amrywiaeth o fesurau ar waith megis llythyrau rhybudd, contractau ymddygiad derbyniol ac yn y pen draw, camau gorfodi os bydd hynny'n briodol.

Dywedodd yr Arolygydd Jon Duckham:

"Mae nifer o achosion trasig o ymosodiadau cŵn wedi bod dros y blynyddoedd diwethaf, gan gynnwys rhai yma yng Nghymru, sydd wedi arwain at ymwybyddiaeth uwch o ymosodiadau cŵn a'r angen i berchnogion fod yn hyddysg a chyfrifol.

"Bydd y fenter hon yn ein galluogi ni, ynghyd â'n partneriaid, i weithio gyda'n cymunedau i wella'r addysg honno yn y gobaith y byddwn yn atal ymosodiadau cŵn sy'n gallu bod yn gwbl ddinistriol i bawb dan sylw.

"Daw perchnogaeth cŵn â chyfrifoldebau, a gall y rheini nad ydynt yn cymryd eu cyfrifoldebau o ddifrif gael effaith hynod ddifrifol ar les eu hanifail anwes a pheri risg wirioneddol i'r gymuned.

"Rydym yn gobeithio y bydd cyflwyno cynllun LEAD yn anfon neges glir ein bod ni a'n partneriaid wedi ymrwymo'n llwyr i ddiogelu'r cyhoedd ac i sicrhau y caiff camau gorfodi eu cymryd yn erbyn perchnogion anghyfrifol nad ydynt yn ymgysylltu ag ymyriad gan bartneriaid."

Lansiwyd menter LEAD heddiw (4 Rhagfyr), a chaiff ei threialu ym mwrdeistrefi sirol Rhondda Cynon Taf, Merthyr Tudful a Phen-y-bont ar Ogwr, gyda'r nod o gyflwyno'r cynllun ledled De Cymru maes o law.

Mwy o wybodaeth am berchnogaeth cŵn cyfrifol a deddfwriaeth bwysig.