Perchenogaeth ci cyfrifol a chŵn peryglus
Anifeiliaid anwes, cŵn, babis ffwr, ffrindiau gorau. Beth bynnag rydych yn eu galw, mae cŵn yn aml yn rhan ganolog o'n cartrefi, a gallant fod yn ychwanegiad da at unrhyw deulu.
Ond waeth beth yw'r brîd, mae gan bob ci y potensial i niweidio ac mae'n gyfrifoldeb ar bob perchennog a bridiwr i gadw ei gi, ei hun ac eraill yn ddiogel.
Mae rhai bridiau hefyd wedi cael eu gwahardd dan gyfraith y DU, felly p'un a ydych yn fridiwr cŵn, yn berchennog ci neu'n ystyried prynu neu ailgartrefu ci, mae hon yn dudalen hanfodol i'w darllen.
Awgrymiadau ar berchenogaeth ci cyfrifol a diogelwch plant
- Peidiwch byth â gadael plant ar eu pen eu hunain â chi, waeth beth yw ei frîd, ei natur, ei oedran na'i berthynas. Ni ellir rhagweld ymddygiad unrhyw gi.
- Peidiwch byth â gadael i blant heidio o amgylch ci, p'un ai eich ci ydyw ai peidio. Gallai rhai cŵn, yn enwedig y rhai sy'n ofnus neu efallai wedi cael eu camdrin, weld hynny fel arwydd o ymosodiad neu oruchafiaeth.
- Peidiwch byth â gadael i blant darfu ar gi pan mae'n cysgu neu'n bwyta. Gall cŵn ymateb yn ymosodol.
- Peidiwch byth â gadael i blant fynd at gi nad ydynt yn ei adnabod. Dysgwch blant i ofyn am ganiatâd perchennog y ci cyn mynd ato i roi mwythau.
- Gwnewch yn siŵr fod gan eich ci ofod tawel i'w ddefnyddio, yn enwedig pan fydd wedi'i gynhyrfu'n ormodol neu wedi blino.
- Peidiwch â gadael i blant chwarae â chŵn a'u teganau heb oruchwyliaeth.
Prosiect LEAD (Ymwybyddiaeth Amgylcheddol Leol ar Gŵn)
Mae menter i hybu perchnogaeth cŵn diogel a chyfrifol wedi cael ei lansio ym Morgannwg Ganol.
Mae prosiect LEAD (Ymwybyddiaeth Amgylcheddol Leol ar Gŵn), a arweinir gan Heddlu De Cymru ar y cyd â sawl asiantaeth partner gan gynnwys awdurdodau lleol a landlordiaid cymdeithasol cofrestredig, wedi cael ei ddylunio i wella'r ymgysylltiad â pherchnogion cŵn o bob brîd.
Nod y broses ragweithiol yw lleihau'r risg sydd wedi codi mewn cymunedau drwy berchnogaeth cŵn anghyfrifol ac ymddygiad gwrthgymdeithasol, drwy ymgysylltu, addysg ac ymyrraeth gynnar.
Bydd LEAD yn galluogi partneriaid i rannu cudd-wybodaeth ac i roi amrywiaeth o fesurau ar waith megis llythyrau rhybudd, contractau ymddygiad derbyniol ac yn y pen draw, camau gorfodi os bydd hynny'n briodol.
Lansiwyd menter LEAD ar 4 Rhagfyr, a chaiff ei threialu ym mwrdeistrefi sirol Rhondda Cynon Taf, Merthyr Tudful a Phen-y-bont ar Ogwr, gyda'r nod o gyflwyno'r cynllun ledled De Cymru maes o law.
Cŵn Bwli XL a bridiau gwaharddedig eraill – Dysgu am y gyfraith
O 1 Chwefror 2024, daeth cŵn Bwli XL yn frîd wedi'i wahardd o dan y Ddeddf Cŵn Peryglus.
Mae hyn yn golygu mae nawr yn anghyfreithlon i:
- gwerthu ci Bwli XL
- gadael ci Bwli XL
- rhoi ci Bwli XL ymaith
- bridio ci Bwli XL
- cael ci Bwli XL allan yn gyhoeddus heb dennyn a mwsel
Mae hefyd yn drosedd yng Nghymru a Lloegr i berchen ar gi Bwli XL oni fydd gennych Dystysgrif Esemptiad ar gyfer eich ci gan DEFRA (Adran yr Amgylchedd, Bwyd a Materion Gwledig). Bydd angen i'r rhai sydd ag eithriad o'r fath gadw at reolau llym er mwyn cadw eu ci.
Dylai unrhyw un sy'n credu y gall fod yn berchen ar gi Bwli XL, ond sydd heb gwneud cais am Dystysgrif Esemptiad, cysylltu â ni ar frys.
Mae'r diweddariad hwn yn benodol i'r brîd Bwli XL, ond mae bridiau eraill eisoes wedi'u gwahardd o dan y ddeddfwriaeth hon. Os ydych yn berchennog ci, neu'n ddarpar berchennog, sicrhewch eich bod yn gwbl ymwybodol o'r bridiau sydd wedi'u gwahardd o dan gyfraith y DU ar hyn o bryd.