Ymgyrch Elstree 2023: Lansio ymgyrch i ddiogelu ardaloedd arfordirol Caerdydd a'r Fro

Mae ymgyrch Heddlu De Cymru ar waith i gadw ardaloedd arfordirol Caerdydd a Bro Morgannwg yn ddiogel a chyfeillgar i deuluoedd dros yr haf.

Nod Ymgyrch Elstree yw cyflawni dull cydweithredol o fynd i'r afael â throseddu, pryderon am ddiogelwch ac ymddygiad gwrthgymdeithasol ar draws cyrchfannau haf poblogaidd y Sir, gan gynnwys Ynys y Barri, Ogwr, Llynnoedd Cosmeston a Marina Penarth.

Bydd swyddogion yn gweithio'n agos gyda chydweithwyr o'r awdurdodau lleol priodol i fynd i'r afael â'r mater hwn. Bydd swyddogion cymdogaeth lleol yn cael cymorth gan gydweithwyr o bob rhan o Heddlu De Cymru, yn ogystal ag ystod o gydweithwyr o'n hasiantaethau partner.

Bydd yn rhedeg o nawr tan fis Medi.

Dywedodd Arolygwyr Bro Morgannwg, Mark Henderson ac Abi Biddle:

"Mae'n ddealladwy bod pawb yn awyddus i fanteisio i'r eithaf ar y tywydd braf ac ymweld â'n hardaloedd arfordirol prydferth dros benwythnos gŵyl y banc, ond byddem yn gofyn i ymwelwyr fod yn ystyriol o'r ardaloedd y maent yn ymweld â nhw.

“Mae ymddygiad gwrthgymdeithasol a throseddu yn cael effaith niweidiol ar ein cymunedau, a byddwn yn parhau i weithio gyda'n partneriaid i fynd ar batrôl yn yr ardaloedd allweddol hyn er mwyn atal hynny.

Bwriad yr ymdrech ar ffurf tîm hon yw atal troseddu ac ymddygiad gwrthgymdeithasol, gan sicrhau bod modd i drigolion ac ymwelwyr sy'n parchu'r gyfraith fwynhau'r ardaloedd arfordirol yn dawel.”

Bydd Ymgyrch Elstree hefyd yn mynd i'r afael â phryderon ynghylch yfed dan oedran, neidio oddi ar glogwyni a'r defnydd gwrthgymdeithasol o feiciau a chwadiau oddi ar y ffordd.

Dilynwch ni ar Twitter @swpValeofGlam ac @SWPCardiff 

#YmgyrchElstree #OpElstree #CadwBroMorgannwgYnDdiogel #CadwCaerdyddYnDdiogel