Gweithio’n galed i gadw Butetown a’r gymuned ehangach yn ddiogel

Mae Heddlu De Cymru yn falch o gynrychioli a diogelu'r holl gymunedau y mae'n eu gwasanaethu.

Rydym yn ymwybodol o bryderon ynglŷn â delio mewn cyffuriau a thrais cysylltiedig yn Butetown. Mae mynd i'r afael â'r pryderon hyn yn flaenoriaeth i ni.

Rydym yn defnyddio swyddogion mewn dillad plaen yn rheolaidd o'n Timau Ymgyrch Sceptre a Throseddau Cyfundrefnol i gasglu cudd-wybodaeth ac adnabod troseddwyr. Yn ogystal â'r patrolau hyn, cynhelir patrolau amlwg iawn gan Blismyn yn y Gymdogaeth a Swyddogion Ymateb.

 

Ar y dudalen nesaf mae rhai enghreifftiau diweddar o weithredu cadarnhaol a sut rydym yn gweithio’n galed i gadw Butetown a’r gymuned ehangach yn ddiogel:

 

Yn ogystal â'r enghreifftiau lleol, mae arfau, a gwerth miliynau o bunnoedd o gyffuriau ac arian wedi cael eu hatafaelu dros y 12 mis diwethaf gan un o dimau arbenigol Heddlu De Cymru, wedi'i lleoli yma yng Nghaerdydd.

Rhwng mis Ebrill 2022 – mis Ebrill 2023, mae Tîm Ymgyrch Sceptre yng Nghaerdydd wedi:

• mynd â 92 o arfau oddi ar y strydoedd
• atafaelu gwerth £5m o gyffuriau a £123k mewn arian parod
• arestio 189 o bobl.

Mae ymateb y gymdogaeth, ymgyrchoedd arbenigol, a thimau eraill yr heddlu yn ategu gwaith Tîm Ymgyrch Sceptre.

 

Bydd Heddlu De Cymru yn parhau i wneud popeth o fewn ei allu i gadw cymunedau'n ddiogel a sicrhau bod pobl yn teimlo'n ddiogel wrth iddynt fyw eu bywydau pob dydd.

 

Dydd Iau 20 Ebrill, 3.45pm. Christina Street.

Swyddogion yn tarfu ar achos posib o gyfnewid cyffuriau. Daethpwyd o hyd i'r cerbyd, a oedd yn defnyddio platiau ffug, ar ôl iddo ffoi a'i ganfod yn Christina Street a chafodd y gyrrwr ei arestio ar ôl i'r swyddogion redeg ar ei ôl. Roedd yr eitemau a atafaelwyd yn cynnwys arian ffug ac iPad wedi'i ddwyn.

 

Dydd Gwener, 21 Ebrill. 4.45pm. Hannah Street.

Ceisiodd y drwgdybiedig ffoi ymaith o'r swyddogion a cheisio cuddio 36 lapiad o grac cocên. Cafodd ei arestio a chafodd ei gartref ym Mhen-y-bont ar Ogwr ei chwilio, lle daeth swyddogion o hyd i chwistrell pupur a chlorian pwyso. Mae'r bachgen 17 oed ar fechnïaeth tra bod ymholiadau gydag amod i beidio â mynd i mewn i Gaerdydd.

 

Dydd Sul, 23 Ebrill, 2pm. Stryd y Gogledd.

Daethpwyd o hyd i chwarter cilo o gocên mewn car a thua £2k mewn arian parod yng nghartref y gyrrwr ar Heol Penarth. Mae dyn 32 oed o Gaerdydd wedi cael ei gyhuddo o droseddau yn ymwneud â chyffuriau ac yn cael ei gadw yn y ddalfa.

 

Dydd Gwener, 28 Ebrill. 6.49am. Christina Street.

Daethpwyd o hyd i 25 gram o gocên yn ystod gwarant chwilio am gyffuriau mewn eiddo. Cyhuddwyd dyn 32 oed o droseddau cyffuriau a'i gadw yn y ddalfa.

 

Dydd Sadwrn, Ebrill 28. 4pm. Sgwâr Loudoun.

Stopio a chwilio dyn 28 oed o Adamsdown oedd ag 20 lapiad o grac cocên, naw lapiad o heroin a phum bag o ganabis yn ei feddiant. Wedi ei gyhuddo o droseddau cyffuriau a'i gadw yn y ddalfa.

 

Dydd Sul, 29 Ebrill. 5pm. Clive Road.

Arestio dyn, 41 oed o Lundain, ar amheuaeth o ddelio mewn cyffuriau. Cyhuddo a'i gadw yn y ddalfa.

 

Dydd Sul, 29 Ebrill. 4pm, Rover Way.

Dyn 35 oed o orllewin canolbarth Lloegr, y credir iddo fod yn gyrru i gyfeiriad Bae Caerdydd, wedi’i stopio gan yr heddlu am ei fod yn yrrwr wedi’i wahardd. Canfod 15 cilo o ganabis a chyllell yn ei gerbyd, ac owns o heroin yn ei drôns. Cafodd ei gyhuddo o droseddau cyffuriau a gyrru.

 

Mae opsiynau eraill ar gael ar wahân i ffonio 101, ac rydym yn annog pobl i gysylltu â ni i roi gwybod am ddigwyddiadau nad ydynt yn rhai brys:

 

🗪 Sgwrs Fyw https://www.south-wales.police.uk/cy-GB/

💻 Rhoi gwybod ar-lein https://www.south-wales.police.uk/cy-GB/riportio/riportio

📧 E-bost [email protected]

📞 101 neu Crimestoppers yn ddienw ar 0800 555 111.

 

Ffoniwch 999 bob amser mewn argyfwng.