Dyn yn cael dedfryd estynedig o 13 mlynedd am ymosodiad ffyrnig direswm ar ei bartner

Mae dyn wedi cael dedfryd estynedig o 13 mlynedd yn dilyn ymosodiad direswm lle y cafodd ei bartner ar y pryd anafiadau mor ddifrifol i'w hwyneb fel y ceisiodd honni iddi gael ei tharo gan gar.

Mae Wayne Phillip Jenkins, 39 oed o Lanelli, yn bwrw dedfryd estynedig o 13 o flynyddoedd, gan gynnwys tymor o naw mlynedd yn y ddalfa gyda chyfnod estynedig o 4 blynedd, am ymosodiad trais domestig adran 18 yn erbyn menyw 36 oed.

Ym mis Mehefin 2022, aeth y swyddogion i ddigwyddiad yn Abertawe lle daethant o hyd i fenyw a oedd wedi cael anafiadau sylweddol i'w wyneb.

Sylwodd y swyddogion a oedd yn bresennol ar ymddygiad anarferol Wayne Jenkins, a ddywedodd wrth swyddogion fod ei bartner wedi cael ei tharo gan gar.

Yn ystod yr ymchwiliad, daeth i'r amlwg fod Jenkins wedi ymosod yn dreisgar a direswm ar ei bartner.

Darparodd y ddioddefwraig dystiolaeth yn Llys y Goron Abertawe lle rhoddodd fanylion yr ymosodiad a'i gadawodd ag anafiadau a newidiodd ei bywyd. Disgrifiodd y digwyddiadau ar ôl yr ymosodiad, gan ddweud wrth y rheithgor sut y gwnaeth Wayne Jenkins iddi gerdded drwy strydoedd a lonydd cefn Manselton, mewn ymgais i guddio'r anafiadau yr oedd wedi'u hachosi iddi. Daeth swyddogion ar ei thraws yn fuan wedi hyn.

Gwadodd Wayne Jenkins unrhyw gyfrifoldeb am yr anafiadau yr oedd wedi'u hachosi i'r ddioddefwraig, a oedd yn golygu y bu'n rhaid iddi fynd trwy dreial o'r herwydd, yn ogystal â chael triniaethau meddygol a llawdriniaethau niferus yn yr ysbyty.

Dywedodd DS Sam Lewis o Adran Ymchwiliadau Troseddol (CID) Abertawe:

“Mae Wayne Jenkins yn droseddwr treisgar a pheryglus iawn ac rwy'n sicr y bydd Abertawe yn lle mwy diogel nawr ei fod dan glo.”

Ategodd y Swyddog a oedd yn Ymchwilio i'r Achos, DC Abi Doxsey:

“Mae'r ddioddefwraig wedi bod yn ddewr a phenderfynol iawn drwy'r ymchwiliad cyfan ac mae hi'n ysbrydoliaeth.

“Mae'n anodd dychmygu'r effaith y mae'r digwyddiad hwn wedi'i gael ar y ddioddefwraig ac eto mae'r dewrder a ddangoswyd ganddi drwy'r artaith hon wedi bod yn anhygoel. Mae'n haeddu pob cydnabyddiaeth am y dewrder y mae wedi'i ddangos ac yn parhau i'w ddangos.