Dedfryd o 14 mlynedd o garchar am ymgais i lofruddio wedi i fenyw gael ei thrywanu yn ei chartref yng nghanol dinas Abertawe.

Cafodd Heddlu De Cymru eu galw ychydig cyn 3pm ddydd Sul 25 Medi 2022 yn dilyn pryderon am fenyw ar Orchard Street, Abertawe. Aeth swyddogion i'r ardal a chanfod menyw 43 oed a oedd wedi dioddef anafiadau difrifol yn sgil ymosodiad gan ei phartner, Christopher Chandler, 57 oed.

Digwyddodd yr ymosodiad y prynhawn hwnnw yn ei chartref ger Orchard Street. Roedd y fenyw wedi cael ei thrywanu sawl gwaith yn rhan uchaf ei chorff a chafodd ei chludo i Ysbyty Athrofaol Cymru yng Nghaerdydd i gael triniaeth bellach. Roedd llafn y gyllell a ddefnyddiwyd yn yr ymosodiad yn un o'r clwyfau o hyd a bu'n rhaid iddi gael llawdriniaeth i'w dynnu.Cafodd Christopher Chandler ei arestio yn y fan a'r lle ar amheuaeth o ymgais i lofruddio.

Yn dilyn ymchwiliad trylwyr gan Dditectifs, cafodd ei ddedfrydu heddiw yn Llys y Goron Abertawe i 14 mlynedd o garchar am ymgais i lofruddio.

Dywedodd y Swyddog a oedd yn gyfrifol am yr achos, Ditectif Gwnstabl Andrew Hirst o Adran Ymchwiliadau Troseddol (CID) Castell-nedd: “Heb os, roedd hwn yn ddigwyddiad brawychus iawn i'r dioddefwr a bu'n rhaid iddi aros yn yr ysbyty am beth amser er mwyn cael triniaeth am yr anafiadau difrifol a gafodd yn sgil y trais a ddangoswyd gan Christopher Chandler.  Mae'r fenyw yn parhau i wella o'r trawma ac yn cael cefnogaeth bellach”. 

“Rwy'n edmygu'r dioddefwr am ddangos dewrder a chryfder diflino drwy gydol y broses hon”.

Ychwanegodd y Ditectif Arolygydd Carl Price: “Mae Heddlu De Cymru yn cymryd pob adroddiad o gam-drin domestig o ddifrif. Rydym yn ymrwymedig i amddiffyn bywydau oedolion a phlant sy'n dioddef y math hwn o gamdriniaeth.

“Mae nifer o gamdrinwyr yn dibynnu ar dawelwch er mwyn iddynt barhau â'r gamdriniaeth. Os ydych yn poeni am anwylyd neu rywun rydych yn ei adnabod, rhowch wybod i ni. Byddwn yn gwrando arnoch.”

Ychwanegodd y Ditectif Arolygydd Price: “Ni ddylai unrhyw un ddioddef yn sgil unigolyn arall mewn unrhyw achos, ond yn enwedig yn sgil rhywun sy'n agos atynt neu rywun y maent yn ymddiried ynddo. Bydd Heddlu De Cymru yn ymdrin â throseddwyr trais domestig yn gadarn ac ni chaiff eu gweithredoedd eu goddef yn ein cymunedau mewn unrhyw amgylchiadau”. 

“Hoffem ddiolch i'r gymuned a gynorthwyodd y dioddefwr cyn i'r gwasanaethau brys gyrraedd ac a gynorthwyodd yr heddlu yn ddiweddarach gyda'r broses ymchwilio”.

Gellir dod o hyd i gyngor a gwybodaeth am gam-drin domestig yma Cyngor ar gam-drin domestig | Heddlu De Cymru (south-wales.police.uk)

DIWEDD.