Mae un o ymgyrchoedd Heddlu De Cymru wedi bod yn mynd i'r afael â phryderon ynghylch troseddu ac ymddygiad gwrthgymdeithasol ar Stryd Tudor, Glan yr Afon, Caerdydd.

Dros gyfnod o dair wythnos, mae patrolau amlwg iawn wedi bod ar waith yn yr ardal yn ystod y dydd a phatrolau gan swyddogion mewn dillad plaen bob nos rhwng 6pm a 2am.

Nod yr ymgyrch oedd tarfu ar weithgarwch anghyfreithlon, atgyfeirio pobl agored i niwed at asiantaethau partner, a sefydlu ymyriadau hirdymor.

Mae rhai o'r canlyniadau yn cynnwys y canlynol:

• Arestio 11 o bobl, gan gynnwys 5 am ddelio cyffuriau.
• 20 o achosion o stopio a chwilio.
• Dod o hyd i un ferch agored i niwed a oedd ar goll yn ddiogel ac yn iach.
• Atafaelu dau gerbyd.
• Atafaelu gwerth £6.5k o dybaco anghyfreithlon.

Dywedodd yr Arolygydd Stuart McDean, o Heddlu De Cymru: “Bydd mynd i'r afael yn gadarn â phryderon ynghylch troseddu ac ymddygiad gwrthgymdeithasol ar Stryd Tudor, yn enwedig yn Litchfield Court, yn parhau i fod yn flaenoriaeth i swyddogion lleol a bydd patrolau rheolaidd mewn lifrai ac mewn dillad plaen yn parhau.

“Rydym yn deall y gall ymddygiad annerbyniol o'r fath fod yn fygythiol ac yn amhleserus i breswylwyr.

“Rydym yn parhau i weithio gyda Chyngor Caerdydd ac asiantaethau eraill er mwyn dod o hyd i atebion tymor hwy i fynd i'r afael ag ymddygiad gwrthgymdeithasol a gweithgarwch troseddol.

“Fel bob amser, byddem yn awyddus iawn i glywed gan breswylwyr a all ddarparu gwybodaeth am y rhai sy'n gyfrifol am droseddau ac ymddygiad gwrthgymdeithasol.”

Yn ystod yr ymgyrch, ymwelodd Gwasanaethau Rheoliadol a Rennir â dau safle manwerthu ac atafaelwyd bron 400 o becynnau o dybaco anghyfreithlon, a oedd yn werth tua £6,500.

Gofynnir i unrhyw un sydd â gwybodaeth am achosion posibl o ddelio cyffuriau neu bobl sy'n rhan o weithgarwch troseddol arall i gysylltu â Heddlu De Cymru gan ddefnyddio'r dulliau canlynol:

🗪 Sgwrs Fyw (9am-4pm, o ddydd Llun i ddydd Gwener) https://www.south-wales.police.uk/

💻 Rhowch Wybod Ar-lein https://www.south-wales.police.uk/cy-GB/riportio/riportio/

📧 E-bostiwch [email protected]

📞 101

Ffoniwch 999 bob amser mewn argyfwng.