Billy Spiller: Yr Heddlu yn cysylltu â theulu cyn swyddog ac arwr y byd chwaraeon

Y llynedd, creodd ein Canolfan Treftadaeth lyfryn i nodi bywyd Billy Spiller, swyddog heddlu ym Mro Morgannwg am 32 mlynedd a sbortsmon amryddawn a gyrhaeddodd statws arwrol ar ddechrau'r ugeinfed ganrif fel chwaraewr rygbi rhyngwladol dros Gymru a chwaraewr criced o'r radd flaenaf.

Mae'r llyfryn, a luniwyd yn ddwyieithog yn y Gymraeg a'r Saesneg, yn cynnwys ffotograffau a ffynonellau gwreiddiol er mwyn adrodd stori Billy a chodi ymwybyddiaeth o'i waith fel swyddog yr heddlu a'i lwyddiannau yn y byd chwaraeon. 

Billy Spiller: Y Dyn a'i Ddoniau

Yn fuan ar ôl i'r llyfryn gael ei greu, daliodd sylw wyres Billy Spiller, Christine Dobson, a gysylltodd â Chanolfan Treftadaeth yr heddlu yn ddiweddarach.

Mae Christine a thîm y Ganolfan Treftadaeth wedi cadw mewn cysylltiad rheolaidd drwy'r flwyddyn, a ddoe, aeth ei theulu a hithau i bencadlys yr heddlu er mwyn cwrdd â'r Prif Gwnstabl a chael taith o amgylch y Ganolfan. Yn ystod yr ymweliad cyflwynwyd copïau caled o lyfryn Billy Spiller i aelodau o'r teulu.

Christine (eistedd ar y dde) a'r teulu gyda'r Prif Gwnstabl ym mhencadlys yr heddlu.

Yn ystod ei hymweliad â phencadlys yr heddlu, dywedodd Christine:

“Fe wnaethon ni wir fwynhau ein hymweliad â phencadlys yr heddlu heddiw, yn enwedig y Ganolfan Treftadaeth. Fe wnaeth y gwaith ymchwil ar fy nhad-cu argraff fawr arnon ni. Roedd yn gymaint o gymeriad ac yn ddyn hyfryd, ac mae'n cael ei golli'n fawr o hyd.”

Y teulu yn mwynhau taith o amgylch Canolfan Treftadaeth yr heddlu

Ychwanegodd y Prif Gwnstabl Jeremy Vaughan:

“Gall stori dda ddod â phobl ynghyd mewn ffyrdd annisgwyl, ac mae stori Billy Spiller wedi llwyddo i wneud hynny. Rwyf wrth fy modd fy mod wedi cael y cyfle i gwrdd â Christine a'r teulu ddoe, ac i glywed ei hatgofion am ei thad-cu.

Mae'n bwysig ein bod yn rhannu ein treftadaeth a straeon eithriadol fel un Billy, oherwydd fel rydym wedi ei weld heddiw, mae ganddynt y potensial i'n helpu i ymgysylltu'n agosach â theuluoedd yr heddlu a chymunedau.”

Cafodd y llyfryn ei lunio ar y cyd â chyn-Brif Swyddog Heddlu De Cymru, Gareth Madge, sydd bellach yn cefnogi'r Ganolfan Treftadaeth fel cynghorydd gwirfoddol. Roedd Mr Madge yn bresennol yn ystod yr ymweliad heddiw a dywedodd:

“Pleser pur oedd helpu i ddatblygu stori Billy Spiller, ac roedd hi'n bleser hefyd cwrdd â'i deulu ddoe ym Mhencadlys yr Heddlu.

Roedd hwn yn brosiect diddorol iawn i fod yn rhan ohono, a hoffwn ddiolch i'r rhai a gefnogodd y prosiect, yn enwedig Andrew Hignell o Glwb Criced Morgannwg.”

Mae Billy Spiller: Y Dyn a'i Ddoniau ar gael i'w ddarllen a'i lawrlwytho drwy wefannau prosiect Canolfan Treftadaeth Heddlu De Cymru: Billy Spiller | Prosiectau | Heddlu De Cymru (south-wales.police.uk)

Os hoffech rannu straeon plismona aelodau eich teulu a'ch hynafiaid, rhannwch nhw â'n Canolfan Treftadaeth drwy e-bostio [email protected]