Nid yw'n Hwyl i Bawb: Ymgyrch Bang

Cerfio pwmpenni, gwisg ffansi ac arddangosfeydd tân gwyllt trawiadol – mae Calan Gaeaf a Noson Tân Gwyllt yn aml yn uchafbwyntiau yng nghalendr y teulu. 

Ond gyda lleiafrif bach yn gweld digwyddiadau'r hydref fel esgus i ymddwyn yn wrthgymdeithasol, gall llawer o bobl yn ein cymunedau deimlo'n ofidus, yn ofnus ac yn bryderus yn ystod y cyfnod hwn.  

Dyma pam y bydd Heddlu De Cymru yn cefnogi Ymgyrch BANG unwaith eto eleni, drwy helpu ein cymunedau i fwynhau'r dathliadau yn ddiogel a gofyn iddynt gofio ar yr un pryd Nad yw Calan Gaeaf a Noson Tân Gwyllt yn Hwyl i Bawb.

Mae'r cyfnod hwn bob amser yn hynod o brysur i'r gwasanaethau brys; derbyniodd Heddlu De Cymru ychydig dros 1,778 o alwadau am wasanaeth* ar 31 Hydref, sef Calan Gaeaf, y llynedd, a mwy na 1,721 ar 5 Tachwedd, sef Noson Tân Gwyllt. Defnyddiwyd y rhif brys 999 i wneud 840 o'r galwadau hynny ar Galan Gaeaf, a daeth 663 o alwadau 999 ar Noson Tân Gwyllt. 

Er bod y galw yn cynyddu ar y diwrnodau hynny, mae'r cyfnod cyn, yn ystod ac ar ôl y dyddiadau hyn hefyd, yn aml, yn hynod o brysur, gan roi pwysau ychwanegol ar yr heddlu a'i bartneriaid.

Bydd ein swyddogion yn parhau i fod yn weladwy yn ein cymunedau yn ystod y dathliadau a chyn hynny er mwyn helpu i atal a chanfod achosion o ymddygiad gwrthgymdeithasol ac anhrefn. 

Bydd ein timau plismona yn y gymdogaeth yn gweithio'n agos gyda phartneriaid awdurdod lleol a manwerthwyr hefyd yn ystod yr ychydig wythnosau nesaf, a bydd ein Swyddogion Cyswllt Ysgolion ac asiantaethau partner yn ymweld ag ysgolion ym mhob rhan o ardal yr heddlu i addysgu disgyblion am beryglon tân gwyllt, coelcerthi a chanlyniadau ymddygiad gwrthgymdeithasol. 

Rydym hefyd wedi creu amrywiaeth o weithgareddau y gall athrawon a rhieni eu lawrlwytho er mwyn helpu i ddiddanu pobl ifanc a sicrhau eu bod yn mynd i ysbryd yr ŵyl. 

Caiff y rhai sy'n pryderu am y dathliadau ac sydd am gael llonydd lawrlwytho ein poster i'w roi ar eu ffenest i atal galwyr digroeso. 

Dywedodd y Prif Arolygydd Anthony Williams, arweinydd yr heddlu ar gyfer Ymddygiad Gwrthgymdeithasol:

"Wrth i Galan Gaeaf a Noson Tân Gwyllt agosáu, rydym yn gwybod bod llawer o bobl yn llawn cyffro ac yn edrych ymlaen at fwynhau'r dathliadau, ond gall y digwyddiadau hyn beri pryder yn ein cymunedau hefyd. Er mwyn helpu i atal ymddygiad gwrthgymdeithasol ac anhrefn sy'n gysylltiedig â thân gwyllt, byddwn yn gweithio'n agos gyda'r gwasanaeth tân ac achub, Ymddiriedolaeth GIG Gwasanaethau Ambiwlans Cymru, a'n partneriaid ehangach.

"Gall ymddygiad gwrthgymdeithasol, llosgi bwriadol a gweithgareddau troseddol eraill arwain at ganlyniadau difrifol, gan gynnwys arestio troseddwyr, eu dirwyo a’u carcharu. Rydym yn annog pawb i fod yn ddiogel ac yn barchus yn ystod y dathliadau fel y gall cymunedau fwynhau'r achlysuron hyn mewn ffordd gadarnhaol a chyfrifol.

"Gofynnwn i bobl chwarae eu rhan i gadw eu hunain a phobl eraill yn ddiogel, gan gofio nad yw pawb eisiau cymryd rhan yn y dathlu.

"Rydym yn disgwyl cyfnod prysur i'r holl wasanaethau brys a byddwn yn cynnal mwy o batrolau mewn ardaloedd lle mae ymddygiad gwrthgymdeithasol yn broblem. Rydym yn annog aelodau o'r cyhoedd i roi gwybod am unrhyw bryderon sydd ganddynt a chysylltu â ni os bydd angen cymorth arnynt.

"Yn olaf, gofynnwn i rieni a gwarcheidwaid gael sgwrs agored â phobl ifanc am eu cynlluniau, gyda phwy maen nhw’n bwriadu mynd allan a ble byddan nhw. Os oes modd, dylech chi fynd ar daith losin neu lanast neu i ddigwyddiadau tân gwyllt wedi'u trefnu gyda nhw, er mwyn helpu i sicrhau bod pawb yn dathlu yn ddiogel ac yn barchus."

 phwy y dylech gysylltu

Mae'r pwysau ar y gwasanaethau brys yn cynyddu'n sylweddol yn ystod cyfnod Calan Gaeaf a Noson Tân Gwyllt. Er mwyn ein helpu i sicrhau bod ein llinellau ar gael i'r rhai sydd ein hangen fwyaf, gwnewch yn siŵr eich bod yn cysylltu â'r asiantaeth fwyaf perthnasol ac yn defnyddio'r dull cysylltu mwyaf priodol.

Mater i'r heddlu yw pryderon am ymddygiad gwrthgymdeithasol a diogelwch y cyhoedd. Os nad yw'n argyfwng, gallwch gysylltu â ni drwy un o'r ffyrdd canlynol:

• Sgwrs fyw: https://www.south-wales.police.uk/
• Rhowch wybod ar-lein
• 101

Mewn argyfwng, ffoniwch 999 bob amser.

Dylid cyfeirio pryderon am sŵn, gwerthu tân gwyllt ac eitemau cysylltiedig eraill, a thaflu sbwriel / tipio anghyfreithlon at eich awdurdod lleol.  Mae'r manylion ar gael yma.

Ddim yn siŵr a yw'ch pryder yn fater i'r heddlu neu rywun arall? Gall y canllaw defnyddiol hwn eich helpu.