'Trecco Watch' yn troi'r llanw o ran ymddygiad gwrthgymdeithasol

Mae riportio ymddygiad gwrthgymdeithasol wedi gostwng 00% diolch i'r cydweithio rhwng ein Tîm Plismona yn y Gymdogaeth ym Mhorthcawl, Cyngor Bwrdeistref Sirol Pen-y-bont ar Ogwr a chwmni Parkdean Resorts. Diolch i bobl a'r cwmni yn riportio ymddygiad gwrthgymdeithasol yn yr ardal, roedd modd i ni ddefnyddio'r data hwn i nodi man problemus a gwneud newidiadau cadarnhaol yn y gymuned.

Yn y maes carafanau ym Mhorthcawl, sy'n cael hyd at 10,000 o ymwelwyr y dydd yn ystod cyfnodau brig, bu cynnydd sylweddol mewn troseddu flwyddyn ar ôl blwyddyn, yn enwedig yn ystod cyfnodau brig y gwyliau.

Fe wnaethom weithredu. Ers lansio 'Trecco Watch' yn 2024, rydyn ni wedi gweithio gyda phartneriaid i wneud y canlynol:

• Patrolau rheolaidd gan swyddogion plismona yn y gymdogaeth
• Diwrnodau Hwyl i'r Teulu yr Heddlu
• Arddangos arwyddion amlwg a brand Trecco Watch i helpu wrth bennu rheolau
• Torri dail yn ôl wrth y brif fynedfa a oedd o flaen y swyddfa ddiogelwch – gan roi sicrwydd i ymwelwyr ac atal gweithgarwch troseddol
• Gosod CCTV ychwanegol
• Rhoi camerâu gwisgadwy i staff diogelwch
• Atgyweirio'r system Adnabod Rhifau Cerbydau Awtomatig (ANPR)
• Cynyddu presenoldeb swyddogion diogelwch
• Llunio llythyr gwahardd ffurfiol
• Gwnaeth Cyfarwyddiaeth Addysg, Blynyddoedd Cynnar a Phobl Ifanc Cyngor Bwrdeistref Sirol Pen-y-bont ar Ogwr wella gweithgarwch ymgysylltu drwy ddefnyddio eu bws allgymorth i ryngweithio'n gadarnhaol â phobl ifanc
• Cynnal cyfarfodydd partneriaeth misol, a oedd mewn rhai achosion yn golygu bod modd i'r heddlu ganolbwyntio ei adnoddau yn unol â chuddwybodaeth gynnar ynghylch dyfodiad grŵp sydd â hanes o ymddygiad gwrthgymdeithasol
• Ymuno â chynllun gwarchod tafarndai Porthcawl

Ond nid dyna ddiwedd ein gwaith.

Er bod y troseddau yn yr ardal wedi gostwng yn sylweddol, mae swyddogion yn parhau i weithio'n agos gyda'r cwmni sy'n rheoli'r parc carafanau, ynghyd â phartneriaid, ac ymgysylltu â'r gymuned gyda'n Diwrnodau Hwyl i'r Teulu sy'n cael eu cynnal tua bob deufis.