Cynaliadwyedd a sut rydym yn gofalu am ein hamgylchedd
5. Caffael a'r Gadwyn Werth
Mae'r gadwyn gwerth yn cynnwys gweithgareddau anuniongyrchol ‘ymhellach i fyny ac ymhellach i lawr‘ y gadwyn sy'n creu allyriadau sy'n gysylltiedig â gweithrediadau Heddlu De Cymru.
Mae allyriadau ‘anuniongyrchol’, a elwir yn allyriadau ‘Cwmpas 3’ yn y Protocol Nwy Tŷ Gwydr, yn anos i'w rheoli a'u lliniaru, ond maent yn eithriadol o arwyddocaol o safbwynt y camau cyffredinol rydym yn eu cymryd i gael yr effaith fwyaf ar ein taith tuag at sero net.
Ymhlith y pethau rydym yn anelu at eu mesur a'u rheoli mae:
- Milltiroedd busnes y tu allan i'n gweithgareddau fflyd uniongyrchol, craidd fel teithiau car preifat a defnyddio trafnidiaeth gyhoeddus.
- Staff sy'n cymudo ac yn gweithio gartref.
- Gwastraff a gaiff ei gynhyrchu yn sgil gweithrediadau Heddlu de Cymru a sut y caiff ei reoli.
- Y defnydd a wneir o ddˆwr mewn gweithrediadau.
- Caffael, y cyfrannwr mwyaf o ran allyriadau o blith ein holl weithgareddau. Fel sefydliad, rydym yn gwario tua £105m y flwyddyn, y mae llawer ohono yn cyfrannu at economi Cymru ac mae gennym gyfle i ddylanwadu ar effaith garbon ein cadwyn gyflenwi.
- Allyriadau a gaiff eu hatafaelu o ystad Heddlu De Cymru.
|
Mae'r sector cyhoeddus yng Nghymru yn caffael £6 biliwn o nwyddau a gwasanaethau bob blwyddyn, y mae llawer ohono yn creu refeniw i fusnesau yng Nghymru. Gall y sector cyhoeddus ddefnyddio rheolau caffael yn gadarnhaol er mwyn helpu i leihau allyriadau mewn nifer o feysydd gan gynnwys cerbydau allyriadau isel iawn a chynhyrchion carbon isel. Gall llwyddiant wrth newid ein dull caffael leihau allyriadau yng Nghymru drwy anfon arwyddion priodol. Gall hefyd baratoi'r gadwyn gyflenwi yng Nghymru ar gyfer marchnadoedd carbon isel ehangach y dyfodol.
|
Dechrau arni
Rydym eisoes wedi gwneud cynnydd da o ran gwastraff, gan dargedu camau gweithredu yn unol â'r egwyddor osgoi/lleihau/ailddefnyddio/ailgylchu mewn termau syml i osgoi, lleihau ac ailgylchu. Rydym wedi torri i lawr ar ddeunydd pecynnu sy'n dod i mewn ac wedi newid i drefniadau gweithio mwy clyfar ar gyfer staff mewn rolau addas.
Rydym yn cynnig cynllun beicio i'r gwaith ac rydym yn gweithio gyda'r adrannau cyllid ac adnoddau dynol i ystyried opsiynau ar gyfer cynllun aberthu cyflogau ar gyfer cerbydau allyriadau isel.
Uchelgais: Maint a Chyflymder yr Her
Mae llawer iawn o waith i'w wneud i fynd i'r afael â'n hallyriadau ‘Cwmpas 3’, gan ddechrau drwy fesur effaith ein gweithgareddau ymhellach i fyny ac ymhellach i lawr y gadwyn gyflenwi yn gywir. Fodd bynnag, rydym yn cydnabod bod cyfle gennym i wneud enillion mawr o ran sut y gallwn ddylanwadu ar gyflenwyr a rhanddeiliaid mewnol i leihau'r allyriadau o'n gweithgareddau.
Mae ein meysydd ffocws allweddol fel a ganlyn:
| Meysydd ffocws | Camau allweddol |
|---|---|
| 1. Cyfrifo carbon ac ymgysylltu â'r gadwyn gyflenwi |
Sefydlu ôl troed carbon ein gweithgareddau Cwmpas 3 a sefydlu methodoleg y gellir ei hatgynhyrchu er mwyn helpu i gasglu a dadansoddi data'n rheolaidd. Gweithio gyda phartneriaid i ddatblygu methodoleg gadarn i gyfrifo allyriadau'r gadwyn gyflenwi. |
| 2. Caffael |
Dechrau llunio canllawiau i gyflenwyr er mwyn helpu i gasglu data CO2e a'u cynnwys fel rhan o gontractau, gan ganolbwyntio ar y meysydd sy'n cael yr effaith fwyaf, fel adeiladau a thrafnidiaeth. Gweithio gyda phartneriaid fel CLlLC er mwyn cael gafael ar ganllawiau i gyflenwyr. Mabwysiadu Cod Ymarfer Caffael Cenedlaethol i sicrhau y caiff gwerth yn y gadwyn gyflenwi ei gynyddu i'r eithaf gan gynnal safon uchel ar gyfer nwyddau a gwasanaethau ar yr un pryd. Dadansoddi'r meysydd lle gwelir yr effaith fwyaf o ran allyriadau yn y gadwyn gwerth a datblygu cynllun gweithredu i dargedu a lleihau allyriadau fesul cam. |
| 3. Gwastraff |
Gweithio gyda rhanddeiliaid i sicrhau gostyngiad o 5% Kg/m2 arwynebedd llawr yn swm y gwastraff a anfonir i'w dirlenwi. Rhoi rhaglen lawn o fentrau lleihau gwastraff ar waith ar draws y sefydliad, gan gynnwys dadansoddi ffrydiau gwastraff er mwyn pennu cyfleoedd i leihau, adfer a gwerthu cyfarpar y mae'r heddlu wedi'i ddefnyddio. |
| 4. Dŵr | Gosod mesuryddion dŵr awtomatig ar draws yr ystad er mwyn hwyluso mentrau rheoli dŵr. |
| 5. Defnydd tir a chynllunio ystadau strategol |
Bydd effeithlonrwydd carbon yn un o egwyddorion craidd gwaith cynllunio ystadau strategol - bydd carbon meintioledig yn fetrig penderfynu allweddol ar gyfer cynllunio datblygiadau newydd, rhesymoli'r ystad a hyrwyddo ffyrdd callach o weithio. Cynnal asesiad o risgiau newid hinsawdd mewn perthynas â'r ystad bresennol er mwyn asesu effeithiau newid hinsawdd fel tymereddau uchel a'r perygl o lifogydd. |